ATIA no ta spera riba un otro lockdown. E consecuencia lo ta funesto pa comercio di Aruba. E cantidad di caso di contagio di Covid19 tin hopi hende preocupa cu un biaha mas lo mester cera e isla y cera economia. Pa ATIA, Asociacion di Industria y Comercio di Aruba, ceramento no ta un opcion.

Director di ATIA, Michelle de Groot y e asociacion ta siguiendo e diferente desaroyonan hopi di cerca, ya cu tur tin efecto economico pa e pais. Tanto e contagio como e establecimentonan afecta. Pasobra cualkier escalacion lo por nifica un sla pisa pa e companianan local cu ya caba ta luchando cu e crisis economico.

Negoshinan no a cera

Bon Dia Aruba a puntra ATIA cuanto compania a sucumbi pa e sla economico. “Nos no tin cifra, pero si nos sa di e sentimentonan di nos miembronan. Hopi a bisa nos cu nan a logra sobrevivi danki na e subsidio di salario (loonsubsidie). Pero, pa por ricibi e sosten aki companianan no por a restructura den e temponan aki. Segun e condicionnan di Gobierno, companianan no por kita trahado pa asina yuda e compania.” De Groot a bisa cu a boga pa e posibilidad pa restructura na comienso, pero a ripara cu Gobierno no lo a sostene e pensamento aki. A cambio a bin e loonsubsidie cu toch a yuda den cubri algun di e gastonan di trahado. “Esey ta locual ta wantando hopi negoshi na bida awor aki.”

Impacto shutdown

E golpi duro tabata sigur tabata e momento cu a cera economia di Aruba na fin di Maart. E loonsubsidie a bira hopi relevante. Particularmente pa companianan cu ta directamente mara na e industria di turismo, nan no tabatin negoshi mes. Hopi a ahusta nan operacion pa duna servicio na localnan. Pero e tabata djis pa haya algun entrada y no tabata suficiente pa cubri tur e gastonan. “P’esey nos tin hopi miedo pa un di dos lockdown.”

Apertura

Por lo general miembronan a mira un mehoracion leve asina cu Aruba a habri na Juli. Segun de Groot e tabata danki na e localnan cu a haya mas confianza y a cuminsa bira mas activo den economia local. Unabes cu Aruba a habri atrobe pa turismo, a mira un leve mehoracion den actividad turistico cu a nifica mas actividad economico. “Tabatin e periodo prome cu a habri cu hende tabata move un tiki mas. Pero ainda, nos ta leu di unda nos tabata. Awor aki te ainda ta ricibi un fraccion di e cantidad di turista cu Aruba tabata ricibi semper, pero e ta yuda companianan draai. Aunke nan no ta ni yega nan break even.” Den otro palabra, atrobe ta danki na loonsubsidie cu ta yuda e companianan aki sigui activo.

Cera negoshi

ATIA a consulta cu Camara di Comercio pa mira cuanto negoshi a cera nan porta desde cu e pandemia a afecta Aruba y sorpresivamente, e cantidad tabata masha poco mes. ATIA mes no a haya ningun notificacion di su miembronan cu nan a, of ta cerando nan porta definitivamente. Pero locual si a ripara cu algun negoshi a baha nan actividad, y hasta e cera temporalmente. Nan ta wardando pa por bin mas actividad pa habri nan porta completo. Di otro banda, tin negoshinan cu a cera. Pero no ta trata aki di negoshinan cu ta registra na Camara di Comercio. E crisis aki a expone e realidad cu tin hopi empresa no tabata cumpli cu tur e reglanan, manera registro na Camara di Comercio y pago di belasting, ni cumplimento cu obligacionnan laboral. E companianan aki no a cualifica pa ningun tipo di asistencia y lo no por haya ayudo tampoco, particularmente si no tin empleadonan registra pa haya ayudo financiero.

Explosion Covid

Realidad ta sinembargo cu ayera Aruba a practicamente drenta den un panico cu e explosion di casonan di Covid. ATIA ta consciente cu e forma con a domina e casonan na Maart, tabata pa cera Aruba. Pero, awor aki no por tuma e mesun paso. Pa e motibo aki, mester tuma e medidanan cu Departamento di Salud Publico ta impone pa controla e brote.

Mester sigui e pasonan cu DVG ta delinea si evita pa bolbe bay den un lockdown. Segun de Groot, tin un limite cu DVG ta mantene prome cu dicidi pa bay den un lockdown atrobe. No sa cua e punto aki ta, pero en todo caso, no a haya keho cu e medidanan anuncia e ultimo dos dianan. “Pero mi ta kere cu e ta necesario pa tuma e medidanan pa e situacion bira pio pasobra esey lo ta hopi pisa pa comercio.”

Cuarentena

Director di ATIA a bisa cu miembronan a discuti e situacion laboral ayera, y hopi compania ta pidi nan trahadonan pa traha na cas. Si esaki ta posibel, ta e miho paso. Pa loke ta cuarentena, mester haci pregunta na SVB. Pasobra si DVG manda un hende na cuarentena, e ta pa un periodo di por lo menos dos siman y e pregunta ta keda colga, ken ta carga cu e gastonan. “Ma compronde cu DVG ta duna un carta na esnan cu mester bay den cuarentena.”

Proyeccion pa e aña

E ta dificil pa proyecta con e aña lo bay pa loke ta comercio. E ta un situacion cu ta cambia constantemente. “Nos tin AHATA den nos directiva tambe y nan outlook ta cu turismo, cu ta e pilar economico di Aruba, lo ta na 40 a 50 porciento si logra domina e virus na Aruba. Tur cos ta depende con ta maneha e virus localmente.”

Prioridad pa ATIA

E asociacion awor aki tin dos prioridad. Uno ta pa Gobierno permiti e flexibilisacion laboral pa asina duna companianan e oportunidad pa sobrevivi e crisis. Y e di dos, ta e acuerdo cu Hulanda.

Si no logra controla e virus y yega na un lockdown, no tin otro opcion. “Nos ta urgi Gobierno pa yega na un acuerdo. Nos a duna nos opinion. Kico e aspecto politico ta algo cu mester negocia. y ta entre Aruba y Hulanda Pero cu mester yega na un areglo ta crucial.”

De Groot a mustra cu Hulanda mes ta para e subsidio di salario pa empresanan Hulandes na luna di September. “Nos no sa kico e plannan ta pa Aruba. Pero sin loonsubsidie y sin cu por restructura e negoshi e ta hopi dificil pa companianan por sigui opera. Mi ta kere e enfoke mester ta pa haci tur cos lo posibel pa mas compania por sobrevivi y asina scapa mas cupo di trabou posibel tambe. Pasobra awor aki berdad ta cu no kier pa hende perde trabou. Pero si un compania cera su porta completo, 100 porciento di trahado lo perde trabou. Esey ta locual nos ta purba trece na Gobierno na sindicatonan. Pa economia e ta importante pa duna espacio na companianan.”