Marinierskazerne ta operado normal. Durante dia por a tene rumornan cu Marinierskazerne Savaneta lo a bay den un lockdown, pa motibo cu lo tin diferente marinier cu ta infecta cu Covid19.
Kazerne Adjudant Arthur van Hofwegen a bisa na Bon Dia Aruba cu algun di e mariniernan berdad a bishita establecimentonan unda cu despues a resulta cu un of mas hende tabata infecta cu Coronavirus.
E mariniernan cu a frecuenta e luganan manera Gusto, Craft y otro mester cumpli cu e mesun exigencianan di DVG cu cualkier otro ciudadano. Particularmente si nan tin sinti cualkier sintoma.
Segun van Hofwegen, ayera hopi a acudi na e centro di diagnostico, despues di a traha cita. Pa awe nan lo tin nan resultado. Prome cu esey, tur mester a warda nan resultado na cas.
Pero te cu awor, e no tin efecto pa funcionamento di Marinierskazerne, e adjudant di kazerne a bisa Bon Dia Aruba.
