(EFE) – Comision di Acusacion di Camara Representante di Colombia, e unico organo habilita pa investiga un presidente na Colombia, ayera dialuna a continua cu e investigacion na e mandatario Gustavo Petro, pa posibel financiamento ilegal di su campaña electoral.

Despues di a rechasa cuatro acusacion presenta, entre otro, pa miembronan di partido oficialista, Pacto Historico, Comision Legal di Investigacion y Acusacion di Camara ayera a continua cu e proceso di investigacion pa presunto financiamento ilegal y di surpasa e cifra di gastonan di su campaña.

Tur esaki a cuminsa ora na luna di juni den varios publicacion periodistico a revela audionan di ex-embahador di Venezuela y un di e personanan mas cerca di Petro durante e campaña, Armando Benedetti, na unda e tabata papia di placa cu por a drenta den e campaña.

Den e audionan ey manda na ex-hefe di gabinete Laura Sanabria, ex-embahador a sigura cu el a recauda “15.000 miyon peso (casi 3.7 miyon dollar) pa campaña di Petro y tambe a bisa cu si e ta papia y ta conta ken a financia e campaña na costa Atlantico, tur di nan ta bay cay cera. Tur esey tabata tema di investigacion, cu despues tambe a causa e detencion di e yiu homber di e presidente, Nicolas Petro, pa enrikece su mes ilicitamente y pa labamento di activos den un caso na unda tambe ta cuestiona e financiamento di e campaña cu a hiba Petro bira presidente.

Fiscalia a detene Nicolas Petro y su ex-casa, Daysuris Vasquez, pero nan a abstene di investiga Petro, debi cu no ta coresponde na nan pa haci esey, pa loke a remiti na Comision di Acusacion di Camara e notificacion. Na esaki a uni e denuncia presenta pa un dozijn di demandante, entre nan dos congresista di oposicion, pa investiga Petro y e posibel financiamento iregular di e campaña.

Awor, pa sigui cu e investigacion, Comision a pidi pa e fase aki na varios organismo e pruebanan y procesonan cu nan tin den nan poder pa sigui cu e investigacion , cu te ainda ta preliminar y nan ta bay haciel’e di manera reserva. Fiscalia a pidi pa manda “tur proceso activo na entidad relaciona cu campaña presidencial,” y den special e investigacionnan contra Daysuris Vasquez, Nicolas Petro y Ricardo Roa, gerente di campaña y presidente actual di Ecopetrol.

Na Corte Supremo, a pidi e posibel investigacion riba e campaña, na Procuraduria a pidi tur proceso pa falta disciplinario durante e campaña, na Contraloria tambe un rapport di a surpasa e cifranan di e campaña, cuentanan registra y otro documentonan tecnico.

Tambe, na revista Semana medio cu a publica tur e scandal, a pidi noticianan tocante e presunto financiamento ilegal y e “fuente di e cual nan a haya e audionan di Whatsapp di Armando Benedetti,” ademas di Direccion di Impuesto y Aduana e declaracion di impuesto di Petro. Te ainda Comision no ta contempla cita ni e presidente ni ningun di e involucradonan den e caso aki.