E ambientalista Sra. Olinda Rasmijn di fundacion StimAruba a declara na Bon Dia Aruba cu practicamente na ultimo ora nan organisacion a wordo invita pa e reunion cu a tuma luga siman pasa cu un planoloog pa traha riba e 16 areanan reserva pa naturalesa. Segun maneho di ministerio encarga medio ambiente, gobierno ta trahando pa haci cambio riba e LRO, Landsverordening Ruimtelijk Ordening, specificamente cambio riba e Ruimtelijke Ordenings Plan (ROP).
Den e reunion aki a wordo invita un grupo di organisacion no gubernamental (NGO) bou iniciativa di Stichting Parkietenbos pa participa y vocifera nan opinion. Sra. Rasmijn a bisa cu nan a bay e reunion aki caminda e tabata tuma luga 4’or atardi, pero 25 minuut pa 4or, nan a wordo invita. El a bisa cu el mes a tende di e invitacion of reunion aki via un periodista cu a yam’e, y el a dicidi di bay pa “wak kico e ta”.
Reunion
E ta sinti cu den e reunion aki a wordo yama pa medio ambientalistanan y ora el a yega tabatin dos representante di StimAruba sinta y un miembro mas di otro organisacion. El a bisa cu e experto aki a bin for di e mesun compania cu ta bay traha riba e Ruimtelijke Ordenings Plan (ROP) di Aruba. Pero igualmente el a bisa cu e compania aki ta e mesun compania envolvi tambe cu e proyecto di parke di turbina pa Noord di nos isla.
Sr. Rasmijn a laga sa cu cinco aña pasa tur e organisacionnan no gubernamental a bay EPI pa atende un reunion riba e mesun topico. E tabata un reunion for di mainta te merdia unda a wordo papia y traha un lista di sitionan valioso pa nos medio ambiente. Eynan nan a participa pa menciona e 16 luganan cu mester wordo reserva of protegi pasobra gobierno bini cu e milieau wetgeving y e natuur bescherming.
El a bisa cu e tempo aya –un lustro pasa- nan a bin cu plannan bunita caminda , ya caba a wordo menciona e groengebied ta. Esaki a wordo defini como un parti cu ta coy pa noord di Aruba y tur loke ta banda di lama te Arashi ta wordo nombra como area berde protegi. Sra. Rasmijn a declara cu el a sali satisfecho como ambientalista di StimAruba for di e reunion cu a tuma luga cinco aña pasa, ya cu tur hende por a papia y tur hende por a bisa algo. E ta haya cu e momento ey nan a haya cu nan bos a wordo scucha. Te hasta e ta weita tambe cu ora cu nan a haya notula bek di e reunion ey, nan a bira contento inicialmente cu cierto area a wordo protegi tog y esey ta haci bo contento.
Pero den e reunion di diahuebs siman pasa cu e planoloog, el a sinti e mesun sensacion cu ora bo ta traha un cas y bo ta bay bo famianan pa puntra kico nan ta haya for di e sitio, y cada un di nan ta duna nan opinion subhetivo. Pero si bo kier protege algo den su mesun cas, y otro hende ta bisa bo cu esaki no ta necesario, e ta haya cu e ta hopi grave . Y esaki ta e sentimento cu el a sinti ora cu nan a yama e mesun compania cu mester bin traha tur e turbina pa Noord pa elabora un plan pa proteccion di medio ambiente di cierto areanan. “Bo no por yama e mesun compania pa traha e ROP”, el a bisa.
Sra. Rasmijn no kier drenta den discusion pero loke tabata mas corecto pe tabata nombra otro compania independiente cu no ta conoce Aruba pa bin scucha e hendenan medio ambientalista den un tipo di reunion asina.
Igualmente el a bisa cu fundacion StimAruba a abstene di firma un carta cu otro fundacion a bin cune. Nan a abstene pasobra StimAruba ta haya cu ora nan ta firma algo asina e mester ta un hende completamente cu no ta gana placa for di e compania cu a haya e contract. “Ami no ta haya cu ta bon. Ami no por firma algo asina”, el a bisa categoricamente.
El a añadi cu como StimAruba nan ta un fundacion cu tin otro idea y otro opinion y e ta sigur cu tin hopi hende para tras di nan organisacion, y esey nan no por permiti cu algo asina por pasa. Esta cu e mesun compania cu ta bin traha cu e turbina di biento ta esun cu ta traha e ROP! El a conclui bisando cu e no por firma un cos cu ta contra di bo mes principionan”.
Areanan protegi
El a splica cu nan a haya cu e areanan patras di e Faro a wordo considera como “groengebied” pasobra e piedranan cu tin patras eynan, y cu tur hende ta saca potret, ya cu nan ta hay’e bunita, ta algo singular di nos isla. Sra. Rasmijn a declara cu esaki tin su motibo, ya cu pa ehempel Corsou ni Bonaire no tin e tipo di paisahe natural y unico aki. Ta Aruba ta esun cu tin e.
P’esey e ta haya importante pa considera tur e piedranan aki como monumento natural, y esaki a wordo haci, segun Sra. Rasmijn. Pues esaki a keda marca tambe riba e mapa di Aruba como area protegi . Tambe otro area parti pariba di Arashi unda ta e Faro tambe a wordo bira un luga berde protegi, ya cu e ta un area cu entre otro tin bushinan cu ta hopi straño y endemico. Tambe full Arashi a wordo protegi den e mapa cu a wordo traha e tempo aya pa no bin hotel den e area ey, etc…
Den e area urbano di Aruba tambe tin sitio cu a wordo inclui pa proteccion un lustro pasa manera pariba di Hooiberg tambe tin un luga cu a wordo poni pa reserva y proteccion di nan. “Nos ta mira cu unda cu tin cosnan di interes pa Aruba entre otro Bubali Plas tambe a wordo poni bescherming”, el a bisa. Tambe e area unda cu tin pintura di indjan a wordo poni pa proteccion.
El a bisa cu hopi luga unda cu ta bunita y cu ta atractivo manera e beach cu tin dilanti cas nobo di Gobernador, tur e parti aki a wordo poni pa proteccion. Y tambe e mangelnan (Spaan Lagoen) ta para riba e lista cu a wordo traha e tempo aya pa wordo protegi. Segun Sra. Rasmijn internacionalmente Spaan Lagoen a wordo protegi caba, pero aki na Aruba no.
