Su team ta Flying AMA, pero tabata Amadee Nicolaas mes cu Diasabra marduga a impresiona organisador, participante y patronisadornan di Ronde van Aruba, organisa pa Marinierskazerne Savaneta. Nicolaas simplemente a domina e careda di 72 kilometer, luchando contra scuridad, camindanan menos suave, mondi, y despues e biento fuerte cu ta azotando Aruba den e dianan aki.
Bon Dia Aruba a combersa cu e coredo di distancia largo, cu ta recuperando di impacto cu e coremento aki tabatin riba su curpa. “Prome cu Ronde van Aruba, mi a come mi cuminda regular di merdia cu tabata galiña y aros, esta proteina y carbohydrato, y despues mi tabata come ‘rice waffles’ cada rato. Mi no ta come berdura prome cu coremento pa evita fibra.” Nicolaas a pisa 53 kilo prome cu el a cuminza core y ayera a pisa 50 kilo. E careda a kima 3 kilo di dje. “Y bo tabata wak e na mi cara tambe ora cu mi a yega,” Nicolaas a conta.
Normalmente tin masahistanan presente despues di un careda di distancia largo, pero esaki no tabata e caso e biaha aki. Pues Nicolaas a bay cas, bebe hopi likido, incluyendo Refresco pa sucu. Aunke cu e no tabatin apetit, el a forsa su mes pa corta galiña, carbohydrato y su baki di yoghurt. E no por a drumi ya cu curpa tabata yen di adrenalina ainda, pero si a keda relaha riba cama. Despues el a bay train riba bicicleta pa los su pianan y awe el a haya su masashi. “E curpa t’ey.”
El a cuminza train pa Ronde van Aruba desde December pasa, coriendo distancianan largo tur Diasabra. For di 20 te 50 kilometer. “Na comienzo di Mei mi a yega na 50 y e tabata esun mas largo.” E resto di 22 kilometer ya no ta depende di su curpa, sino su forsa mental, e ‘endurance,’ particularmente pasobra e biento tabata cruel, for di aeropuerto te na final. “E ultimo 12 kilometer tabata inmensamente duro. E biento tabata duro pa tur hende.”
Amadee Nicolaas tabata un coredo regular, incluso tempo cu e tabata studia na Hulanda. Pero ta ora cu el a gradua y bolbe Aruba, cu realmente el a cuminza dedica su mes na caredanan di distancia largo. Na edad di 25 el a dicidi cu e kier core marathon. “Bo ta bira adicto.”
For di mucha e tabata mira su tata, difunto Alfonso ‘Boy’ Nicolaas, ta core. “Mi tabata bisa cu mi tata tabata loco. E tabata lanta marduga, hasta ora di vakantie, pa bay core. Awor mi mes ta haci mescos.” Y e tin sosten completo di su mama, Carmen Nicolaas – Williams, kende despues di un carera impresionante den servicio publico ta brinda e sosten necesario na su yiu durante su caredanan.
E sosten di su mama ta crucial pasobra Amadee, kende tin un Masters den Finanzas, tin un trabou pisa y despues ta pasa un averahe di 20 ora pa siman ta train, y ora ta prepara pa caredanan “mi ta train hasta 30 ora pa siman,” Nicolaas a bisa na harimento, agregando cu casi e no kier a bisa cuanto ora e ta train pa siman. Di otro banda, e ta preparando tambe pa bay e Iron Man na Francia denter di algun luna, pues e mester train ciclismo, landamento, y coremento, banda di e training pa su musculonan keda fuerte.
Ta un training cu ta necesario y specialisa. No ta cuestion di simplemente core. E ta train bou guia di su coach Aldrick Maduro, conoci pa train e top atletanan di Aruba. Asina Maduro a cambia su forma di train, eliminando cross fit y enfoca mas riba resistencia. E tabata nifica haci su musculonan mas fuerte pero tambe mas fini. Asina Nicolaas a logra core e Chicago Marathon y despues un Iron Man. “Y mi a cualifica pa e Boston Marathon. E tempo ey nos a realisa cu mi ta traha pa distancia largo.” Y pa coredonan di distancia largo, edad mas halto ta un beneficio. Pasobra aunke kizas e velocidad por baha un poco, experiencia, bon training y forsa mental ta bira mas skerpi. “Den e ultimo añanan ta miho so mi a bira. Bo ta bira mas sabi, bo ta train mas sabi. Bo sa kico pa haci y kico pa come. Tur esey ta hunga un rol.”
Coremento di distancia largo ta un peso grandi pa cualkier hende. P’esey mes Nicolaas ta enfatisa cu no mester cuminza pa core duro. “Mi tin hopi kilometer den mi pianan. Ora cu cuminza core mester come bon proteina, carbohydrato y mester train den gym. Mester hisa peso, specialmente hende muhe cu despues di 30 ta cuminza perde masa muscular. Mester tin un curpa fuerte pa wanta un careda largo. Ta combinacion di hisa peso y coremento, y otro ehercicio ta yuda cu por tin exito den careda di distancia largo.” Di otro forma, un hende ta haya lesion cu por caba cu cualkier posibilidad di core.
Na e momentonan aki, Amadee Nicolaas tin algun sponsors cu ta yud’e cubri gastonan y e ta contento di mira cu tin mas compania ta sostene deporte. Algo cu ta necesario ya cu e no ta un actividad barata. For di sapato te na gym, e tin su costonan. Y Amadee Nicolaas mes kier stimula mas hende, particularmente hende muhe pa ta activo den e deporte di coremento di distancia largo. “No ta un deporte olimpico, pero si ta un deporte di resistencia. Hende muhe tin forsa mental grandi,” segun Nicolaas. Aunke cu e tabata sa cu e tabata prepara pa 72 kilometer di coremento, pa Amadee Nicolaas tabata otro prueba mas cu hende muhe tin potencial grandi. Pasobra e por a laga hopi atleta mas jong y mas musculoso atras, cu ta inclui Mariniernan cu ta train tur dia. E tabata otro prueba di e fortalesa mental di hende muhe.
Es mas, un miembro femenino di su team di coremento, cu ta den e spectrum di Autismo, tambe kier bira un coredo di distancia largo. “E sa con e mester train, pues keda pendiente p’e,” Nicolaas a bisa cu orguyo.
