Pa e trahadonan di e compania Manrique Capriles e temporada di Pasco y Fin di Aña aki no a habri mucho bon. For di Corsou, gerencia di e compania a informa cu no tin espacio financiero pa paga bonus di Pasco. Esaki a haci cu ayera mainta e trahadonan hunto cu nan sindicato FTA a dicidi bay den accion dos ora.

Presidente di FTA, Hubert Dirksz a bisa cu esaki ta un violacion flagrante contra Contract Colectivo (CAO) cu ta valido. “E trahadonan nan cultura ta pa haya bo bonus di Pasco…”, el a agrega. Nan tin comprension cu e doño di e compania, cu na Corsou nan operacion no a bay bon. Pero na Aruba si e compania ta draai bon, specialmente e departamento di pharma cu ta bon negoshi. Te hasta a yuda pa sostene esunnan na Corsou.

E compania na Aruba ta haci negoshi y ta produci placa, y nan tin bon trahado. Di banda di FTA, no ta haya motibo pa e compania aki no paga bonus di Pasco pa un grupo di alrededor di 30 trahado. E bonus aki ta un derecho di e trahadonan para den e CAO vigente. “Nos ta kere cu esey mester wordo respeta”, segun Dirksz.

Reduccion di operacion.
Si no bin un solucion eventualmente, FTA lo bini cu un caso den corte pa defende e derecho di e trahadonan. E ta un paso cu sindicato ta evaluando. Si mester, nan ta aumenta nan accion of nan ta bay corte. Sinembargo, Dirksz ta spera cu e relacion di confiansa por prevalece entre ambos parti envolvi. Pero esaki ta demanda cu mester papia palabra cla.

Sinembargo e compania a mustra -segun presidente di FTA- cu lo bay reduci su operacion na Aruba. “Nos no sa di ki forma!”, el a bisa. FTA ta lamenta cu e compania no ta papia palabra cla tocante e situacion di e compania, y con ta para cu nan trahadonan. Ya cu si e situacion ta malo, ‘ta malo e ta!’, el a bisa.

FTA lo dicidi di bay corte of para pafo y nan ta na expectativa di kico e compania ta bay bisa. “E compania tin cu bisa definitivamente, nos ta bay paga of nos no ta paga. Anto bo ta violando CAO y tin consecuencianan,” el a bisa.

Dirksz a declara cu e trahado a bay den accion te 10or di mainta, y unabes cu e ora aki a yega, nan a bay bek haci nan trabou.

Presidente di FTA a bisa cu siman pasa a informa e sindicato riba e decision di e compania pa no paga bonus di Pasco e aña aki. Aunke tanto e trahadonan como e sindicato a wordo informa den pasado cu e situacion di e compania ta bayendo dificil, specialmente na Corsou, caminda e situacion economico no ta bon.

Nan por compronde cu e maneho anterior di e compania no a bay bon y nan ta bin papiando riba e situacion aki. FTA tin contacto cu e sindicato na Corsou, y basa riba e situacion cu a surgi na Corsou, e sindicato tin comprension pa e compania. Pero esaki no ta kita cu e compania no ta cumpli cu e CAO y derecho di e trahadonan.

Reunion.
E sindicalista a informa cu diamars otro siman cu ta net e dia cu mester paga bonus, gerente general di e compania lo bin Aruba pa sinta hunto cu e sindicato.

“Ohala cu e bin cu e placa. E ora ey nos lo tin e problema aki tras di lomba”, Dirksz a bisa.

El a agrega cu esaki ta un intento di gerencia di e compania pa evita e paro cu e trahadonan ta dicidido di bay den dje. Pues e decision di para trabou lo afecta e benta y mirando cu e compania ta draai ‘hopi bon’ na Aruba, e tin su efecto. Sindicato ta cualifica esaki como un strategia pa reduci operacion, cu e consecuencia cu ta poniendo presion riba e trahadonan. Ademas e placa cu ta wordo produci no ta pa Aruba so, sino pa yuda alivia e situacion di e compania na Corsou tambe.

El a declara na Bon Dia Aruba cu e situacion actual di e trahadonan ta di un incertidumbre total. Mirando cu e compania a reduci parti di su operacion na Corsou, FTA ta mira cu esaki ta parti di intento cu tin na Aruba tambe. Pero na Aruba no a resulta mas facil cu na Corsou. Ya cu na Aruba si e negoshi ta draai bon y e trahadonan ta resisti, y logicamente no mester bin cu medida contra nan.

Te ainda FTA no tin un ora specifico pa e reunion aki cu gerente general, William Da Costa Gomes. E sindicalista a indica cu e proposicion pa sinta na mesa mester wordo haci oficialmente, preto riba blanco, pa asina fiha e ora precies, na unda nan ta bay reuni y kico ta e agenda.

El a laga sa cu esaki ta un situacion serio cu ta afecta e trahadonan, y mester wordo atendi di un manera serio tambe. Pero nan por mira cu lamentablemente e compania no ta cumpliendo cune.

 

 

 

LEAVE A REPLY

Please enter your comment!
Please enter your name here