ORANJESTAD – Adolescente ta experimenta na ocasion, of algun ta uza na un forma regular cierto substancia, a pesar di tur conseho of advertencia cu nan ta ricibi pa abstene of tene cuidado na uzo. Den un reciente entrevista cu Gino Wauben di ILA foundation a splica tocante e tema aki.

Comprende e consecuencianan
Segun Waubenm e adolescentenan mester compronde e consecuencianan di viola reglanan di scol, leynan di e pais contra uzo, posesion y benta di alcohol, marihuana y otro droga. Si nan wordo gara, nan lo topa cu e sistema di husticia cu lo trata nan como criminal y cu por ta severo pa delicuentenan hubenil.

E castigo corespondiente pa kibra e reglanan ta contene e riesgo di ta mas severo cu e riesgo pa e salud di e adolescente, manera expulsion di scol, un strafblad y stigma social, y tur esey ta haci mas difcil pa haya trabou den futuro. E maneho di cero tolerancia a ricibi critica serio.

Segun Wauben ta splica cu ta crea consecuencianan pa studiante, famia y comunidad cu no tabata e intencion. E maneho ta contribui na scol pa prizon, unda hoben hopi biaha esunnan cu ta pertenece na grupo minoritario den sociedad ta keda expulsa di scol, ta imposibel pa nan haya trabou y como consecuencia, ta termina den prizon como adulto.

“Pa bin cu mensahe, sigur pa motibo cu accidente di trafico causa pa abuso di alcohol ta ocupa e prome luga di locual ta causa e morto bou di hobennan. Como educacion sexual, pa uza condom pa evita malesanan of embaraso den adolescentenan pa siguridad. Ora un hoben cu ta uza of experimenta, no kiermen nan ta mala mucha of mayornan ta faya. E hecho cu ta uza droga ta parti di cultura den un adolscente su bida na varios pais di mundo. Segun investigacion, e hoben por sali for di e fase sin ningun daño na su curpa.”

Segun Wauben ta splica cu e miho forma pa conseha e adolescentenan pa ta sigur y acepta e realidad, pa nan tuma un decision responsabel, pa e informacion ta honesto y a base den ciencia.

E ta continua splica cu tin propaganda den moderacion ora cu hoben persisti den experimenta. Promove comprension di e consecuencia legal y social di e uzo di droga. Nan mester pone siguridad na prome luga, como tambe responsabilidad personal y conocemento.

“Educacion di droga mester ta efectivo, basa riba conocemento cientifico, y mester reconoce e habilidad di adolescente pa nan por compronde, analisa, evalua y tuma responsabilidad pa nan accion. Ni maske con impulsivo of imprudente nan por ta”, Wauben ta splica.

E importancia di moderacion
Segun Wauben ta bisa cu e gran mayoria di hobennan no ta termina den dependencia of custumbernan abusivo. Pero e ta remarca cu esunnan cu ta uza alcohol, marihuana of otro droga, mester compronde cu tin diferencia grandi entre uzo diario y uzo ocasional.

Nan mester sa con pa reconoce conducta iresponsabel ora ta trata di luga, ora, cantidad y frecuencia di uzo. Ora hobennan sigui uza a pesar di advertencianan, nan mester controla nan uzo, sea di practica moderacion y uzo limita.

E ta continua splica cu uzo di droga por afecta di un forma negativo e prestacion academico of na trabou, haciendo e hopi mas dificil pa tin exito na scol of pa cumpli cu tur responsabilidad; uzo nunca ta apropia y hasta por ta peligroso, pa presenta intoxica na scol, trabou, actividadnan deportivo, ora di stuur of cualkier otro actividad serio.

Sinembargo e ta bisa cu awendia tin mas informacion cu antes con pa educa y splica miho, pero ainda tin e preocupacion pa e siguridad. E prome stap segun Wauben, ta scucha pa wak kico ta pasa den realidad tocante e uzo di droga, door di scucha e adolescentenan nan storia tocante nan bida y nan sentimentonan. Esaki lo guia nan accion inteligente y pensa bon.

“Famia mester ta uni, pa nan por comparti pa combersa y conecta cu otro. Tin otro forma di habri combersacion natural. Manera uzo di droga den pelicula, television y musica. Preferibel pa no husga, pa nan sa cu nan mayornan ta dispuesto pa scucha cualkier cos cu nan tin di bisa, cu e confiansa t’ey. No ta manera di strafnan di biaha.”

Di dos stap ta siña, mayor y docente mester asumi nan responsabilidad pa adkiri conocemento tocante efectonan fisiologico, psicologico y sociologico di alcohol y otro droganan. Esaki ta exigi lesa y haci preguntanan.

Familiarisa cu e cultura di adolescente a traves di medionan imprimi y electronico. Siña locual adolescentenan ta gusta wak. Siña tocante e variedad di droga cu ta disponibel pa sigura e fuentenan basa riba ciencia y ta balansa.

E di tres ta actua pa prevencion di abuso di droga. “Ta importante pa tene adolescentenan ocupa mas tanto posibel, no solo durante ora di scol, pero traimerdia. Adolescentenan cu ta ocupa ta menos inclina pa uza marihuana of otro droga, y tambe menos posibilidad di haya problema cu droga.”

Ehempel cu e ta menciona ta programa di despues di scol manera deporte, arte, drama, actividadnan creativo y cu ta disponibel pa tur studiante di scol secundario di preferencia gratis of na un prijs mas abou posibel. Mayornan mester exigi tipo di programanan asina den nan comunidad y na scol di adolescentenan.

Den caso cu tin algun mayornan cu a experimenta cu droga ora nan tabata hoben, anto ta haya miedo di conta nan mesun experiencia, pero esaki por crea confiansa entre nan yiu ‘confiansa cu credibilidad’. Honestidad en general ta e miho maneho.

E paso 4 ta yudansa, cu ta importante pa sa kico pa haci ora tin sospecha cu un adolescente of cualkier persona ta haya un reaccion negativo na alcohol, marihuana of otro droga. “No ta existi un receta cu ta fit pa tur problema di adolescentenan cu alcohol y otro droga. Na final e muchanan mas sano, sea nan a experimenta of no cu droga, ta esunnan cu tabata tin mayornan cu tur momento tabata presente pa nan stima nan, y tabata envolvi den nan bida”, el a finalisa bisa.