Organisacion di Nacionnan Uni (ONU), encarga cu vigila e cumplimento di e tratadonan encuanto droga, a alerta ayera contra e ‘banalisacion’ di e riesgonan di consumo di cannabis, drentando den e intenso debate internacional tocante e adpocion di norma mas permisivo di e narcotico aki.

E informe anual di International Narcotics Control Board (INCB), presenta ayera na Viena, Austria, ta dedica na e ‘malentendidonan’ cu nan ta considera cu ta rondona numeroso iniciativa legal na henter mundo, specialmente riba continente Americano.

E tratadonan internacional contra droga ta contempla solamente uzo di cannabis pa meta medico y cientifico.

“Legalisacion di cannabis pa meta recreativo, manera a mira den un grupo chikito di pais, ta representa no solamente dificultad pa aplicacion universal di e tratadonan, sino tambe un problema importante pa salud y bienestar, en particular di hoben”, asina Viroj Sumyai, presidente di INCB, a resumi na un rueda di prensa ayera.

INCB ta un organo forma pa 13 experto cu ta evalua cumplimento di e tratadonan. Numeroso analista ta califica e board di tin spiritu conservador, ya cu nan ta critica cualkier iniciativa cu ta aleha di e convencionnan encuanto droga.

Den e linea aki, e board a censura Uruguay y Canada, e dos estadonan cu a legalisa benta di cannabis recreativo, como tambe varios estado Mericano cu tambe a tuma e paso aki.

Ambos pais a adopta e legislacion novedoso aki, argumentando cu e regulacion di benta lo desinfla un creciente mercado preto cu ta alimentando un economia ilegal.

Legalisacion ta aumenta disponibilidad di e droga aki, y ta reduci e riesgo percibi y e rechaso social di su consumo, cu por causa, di perdida di memoria te trastorno psicotico, e board ta recorda.

Pero INCB no ta keda ey, y ta critica tambe e programanan ‘mal reglamenta’ di cannabis medicinal, y ta haya cu den algun caso nan ta ‘un antesala’ pa legalisacion total di e droga.