Rednan social a bira un di e medionan mas popular pa promove oportunidadnan di inversion. Anuncio atractivo cu ta priminti ganashi rapido, trabou simpel y libertad financiero ta aparece cada bes mas riba medionan social. Hopi biaha esakinan ta dirigi riba personanan cu tin poco conocemento of experiencia cu inversion.

Riba un articulo cu FIU-Aruba a laga publica algun siman pasa, a haya pregunta riba cierto promocionnan cu ta circula y ta invita hende pa inverti un suma chikito, afirmando cu participante por gana placa door di tuma tempo pa ‘click’ algun biaha riba propaganda, video, website. Door di tuma tiki tempo pa haci esaki, nan capital ta crece rapidamente. FIU-Aruba a recorda algo semehante di algun aña atras cu tabata organisa reunionnan pa promove inversionnan den oro. Un actividad cu a causa hopi conmocion internacionalmente y despues a caba na nada y hopi hende, mundialmente a perde hopi placa.

FIU-Aruba ta indica cu, aunke tur oportunidad di inversion mester wordo evalua riba su propio merito, promocionnan cu ta mustra cierto caracteristica mester wordo trata cu hopi prudencia.

Si algo ta parce demasiado bon pa ta berdad

Inversionnan legitimo semper ta mara na cierto riesgo. No tin ningun inversion cu por garantisa ganashi halto cu poco esfuerso y practicamente sin riesgo. Mercadonan financiero ta cambia constantemente, companianan ta conoce ganashi y perdida, y inversionistanan profesional ta dedica añanan pa desaroya nan conocemento. FIU-Aruba ta conseha cada ciudadano pa ta critico, ora nan wordo invita pa reunionnan of ta ricibi promocion cu ta priminti:

ganashi garantisa of hopi rapido;

ganashi despues di haci trabounan online masha simpel;

ganashi sin mester di ningun conocemento financiero;

obtene libertad financiero cu poco esfuerso.

Conoce e señalnan di advertencia

Seguramente, no tur promocion necesariamente ta fraudulento, sinembargo, cada persona mester por reconoce diferente señalnan cu regularmente por indica fraude di inversion.

Promesa di ganashi irealistico

Anuncionan cu ta sugeri cu bo inversion lo crece considerablemente den algun siman of un luna, hopi biaha ta crea expectativanan cu no ta real. Cualkier inversion cu ta priminti hopi ganashi mester splica claramente:

con e ganashi ta wordo genera;

unda e placa ta wordo inverti;

cua riesgonan ta existi;

pakico e rendimiento ta sostenibel.

Si e preguntanan aki no por wordo contesta claramente, bo tin motibo pa cuminsa duda mesora den y sea cauteloso.

“Click y gana”

Awendia, hopi casonan di fraude online ta usa e modelo di “task-based earning”, unda participante ta wordo bisa cu loke nan mester haci ta solamente algun cos simpel, manera “click” riba un boton, duna un “like”, of promove cierto contenido pa genera entrada. Esaki por parce algo inocente, pero hopi biaha nan ta sirbi solamente pa crea confianza y despues ta anima e participante pa inverti sumanan mas grandi.

Pago den cryptocurrency (criptomoneda)

Hopi di e promocionnan aki ta pidi pago den cryptocurrency manera USDT (Tether). Cryptocurrency mes no ta ilegal y tin hopi aplicacion legitimo. Sin embargo, unabes cu cryptocurrency a wordo transferi, ta hopi dificil pa recupera esaki, y den hopi caso, imposibel si e inversion resulta fraudulento. Diferente na un transferencia bancario tradicional, transaccionnan cu cryptocurrency generalmente no por wordo reverti.

Reunionnan enfoca riba reclutamento

Un otro caracteristica comun ta organisacion di presentacionnan, reunionnan informativo of seminario pa invita mas hende participa. Den algun caso, participante ta haya comision pa trece participante nobo. Ora e modelo di negoshi ta depende principalmente di reclutamento di participante nobo, y no di actividadnan comercial real cu ta genera ganashi, consumidor mester pone bon atencion y evalua si berdaderamente e ta desea di participa. Mester tene hopi cuidao.

Falta di transparencia

Un instancia cu ta promove inversion legitimo normalmente ta transparente tocante:

kende ta propietario di e compania;

unda e ta legalmente registra;

si e tin un licencia di operacion of ta wordo supervisa pa autoridadnan competente;

con fondo di inversionistanan ta wordo maneha;

si tin auditoria independiente;

con exactamente e ganashi ta wordo genera.

Si e informacion aki ta dificil pa obtene of ta keda poco cla, e ta un motibo adicional pa tene cautela.

Esaki ta un schema Ponzi? Un wega di Pyramid?


 For di material di promocion solamente no por deduci cu un plataforma ta opera como un esquema Ponzi of ta trata di un wega di pyramid. Sin embargo, ta importante pa nos comunidad comprende con esaki normalmente ta funciona.

Den un schema Ponzi of wega di Pyramid:

e prome participante por ricibi pago;

e pagonan aki hopi biaha ta bini for di inversionnan di participante nobo, y no di ganashi real;

confianza ta crece pasobra e prome participante ta comparti experencianan positivo;

mas y mas hende ta inverti;

finalmente, ora entrada di participante nobo baha, e esquema ta cay den otro y ta laga mayoria participante cu perdida financiero considerabel.

Lastimamente, hopi victima ta descubri e fraude ora nan purba saca nan placa y ta keda sin por haci esaki.

Sea alerta. Proteha bo mes prome cu bo inverti

Prome cu bo manda placa na cualkier plataforma di inversion online, haci e pregunta:

E compania tin licencia di un autoridad financiero reconoci?

E compania por splica claramente con e ganashi ta wordo genera?

Tin estado financiero di un auditor (accountant) disponibel?

Bo por retira bo placa sin mester paga costo adicional?

E ganashi ta depende di participante nobo cu bo mester introduci?

Autoridadnan financiero a publica advertencia tocante promocion, programa of riesgonan semehante?

Un simplemente ‘SI’ riba e preguntanan aki no ta suficiente. Si bo no por haya contesta concreto, bo no por verifica y loke bo a haya como contesta no ta convincente, bo decision mas sigur ta pa no inverti. Semper busca conseho di un persona cu sa un tiki mas cu bo mes. Den hopi caso, ta net esnan vulnerabel, ciudadanonan cu ta traha duro pa nan cen, y cu tin deseo pa multiplica esaki ta esnan cu ta bira victima.

Ta uza confianza como e arma mas fuerte

Un individuo cu e intencion pa saca placa di otro, ta comete fraude, hopi biaha ta cuminsa na crea confianza cu e victima, pa medio di:

website profesional;

reunionnan local;

ta mustra su mesun saldo riba su cuenta, cu e la gana hopi caba;

comparti testimonio di participante cu aparentemente a gana placa;

anima hende pa cuminsa cu un suma chikito prome cu nan pidi inversionnan mas grandi;

ta parti regalo;

crea un sentido di urgencia, bisa cu e oportunidad ta limita.

Tur e tecnicanan aki tin un solo meta: pa bo tuma un decision rapido sin haci suficiente investigacion.

Nos mensahe

Fraude financiero mundialmente ta sigui evoluciona. Criminalnan ta uza cada bes mas rednan social, aplicacionnan di mensahe y cryptocurrency pa yega na esnan vulnerabel, victimanan potencial. Bo decision di inversion mas sigur ta semper un decision basa riba informacion confiabel. Prome cu bo inverti bo placa, verifica e compania, busca conseho independiente, compronde e riesgonan envolvi y nunca laga presion, entusiasmo of promesanan di ganashi facil reemplasa un investigacion serio. Tene semper na mente, cu si un inversion ta priminti ganashi extraordinario cu poco esfuerso y poco riesgo, esaki mester motiva bo pa bo haci bo mesun investigacion rigoroso. Tene cuenta tambe cu website nan falso. Haci pregunta na esnan mayor di bo, pasobra den pasado, aki na Aruba ta hopi hende a perde hopi placa cu e mesun tipo di promocionnan aki. Prudencia awe por preveni un gran perdida financiero mañan.