Dialuna mainta, Prome Minister Mike Eman, den su calidad di Minister di Cultura, a firma e decreto ministerial pa duna inicio oficial na Carnaval 73, cu ta cuminsa e siman aki.
E acto a tuma luga na Bestuurskantoor den presencia di presidente di Stichting Maneho di Aruba su Carnaval (SMAC), Russette Croes, presidente saliente Darren van Ommeren y consehero di Ministerio di Cultura, Zuleika Wever.
Cu e decreto aki, Gobierno di Aruba ta confia SMAC un biaha mas cu e coordinacion y organisacion di e actividadnan carnavalesco, cu ta cuminsa dia 11 di november 2026 y ta continua den januari y februari 2027.
Gobierno ta reafirma su compromiso cu preservacion y fortalecemento di Carnaval di Aruba, cu no solamente ta un parti esencial di nos identidad cultural, sino tambe ta contribui na nos economia y promocion di Aruba como destino turistico.
Cu e colaboracion aki, Gobierno hunto cu su departamentonan ta sigui sostene continuidad di Carnaval como un tradicion cu nos ta comparti cu orguyo y cu mester preserva pa e generacionnan futuro.
