Durante e fin di siman aki, Korps Politie Aruba (KPA) lo intensifica su presencia policial riba caya y ehecuta controlnan preventivo, incluyendo preventief fouilleren, como parti di e esfuersonan pa mantene orden publico y siguridad den nos comunidad.
E enfoke ta principalmente riba prevencion di incidentenan lamentabel y ta enfoca principalmente riba control di arma di candela. E controlnan lo tuma luga den e conocido hot zones pero no ta limita na e sitionan aki so.
Presencia policial fuerte, combina cu controlnan preventivo, ta contribui na un ambiente mas sigur y ta permiti autoridad actua prome cu situacionnan por escala.
E meta no ta solamente pa interveni ora un incidente a sosode, sino principalmente pa preveni cu esaki sosode. Comunidad tin e derecho pa por sali, disfruta di nan fin di siman y bolbe cas sigur na final di anochi.
Minister Dowers ta haci un yamada na comunidad pa uza sano huicio y respeta nos leynan. E accionnan aki ta tuma luga cu profesionalismo, respet y den cuadro di ley.
Husticia lo sigui traha riba fortalecemento di presencia policial, accionnan preventivo y cumplimento di ley, cu un meta comun: mantene Aruba un pais sigur pa nos comunidad y tur esnan cu ta bishita nos isla. Aruba ta un isla dushi y sigur, ban want’e asina.
