Ministerio Publico ta sigui lucha duro contra posesion di arma di candela. Arma di candela ta forma un peliger grandi pa seguridad publico. P’esey ta consecuentemente exigi castigonan halto di prison pa posesion di arma di candela. Asina a keda demostra tambe den casonan ultimamente.

E siman aki Corte den Prome Instancia a condena un sospechoso den asina yama snelrecht pa un castigo di prison di 24 luna, di cual diesdos ta condicional, y un tempo di prueba di tres aña. E homber aki tabatin un mitrayador den su poder pa añanan largo y tabata warda esaki bao su cama.

E otro sospechoso den e mes caso aki tambe lo mester presenta pronto dilanti Hues. A haya foto y video di e mesun mitrayador den su poder.

Sa pasa regularmente cu casonan relaciona cu arma di candela ta sali na cla door cu hende ta warda foto y video riba nan celular. E siman aki Corte den Prome Instancia lo bolbe trata un caso di arma di candela den cual e sospechoso tabatin foto di diferente arma di candela riba su celular, entre nan un pistol, un revolver y un mitrayador. Den e caso aki tambe lo aplica snelrecht.

Mas of menos dos siman pasa atrobe un otro sospechoso a wordo condena pa posesion di un revolver carga den su tas. El a haya un castigo di prison di 21 luna, di cual seis ta condicional, y un tempo di prueba di tres aña.

Ora di determina e exigencia di castigo pa posesion di arma di candela, fiscal ta sigui e Richtlijn vuurwapens en munitie, cu a ser hancra pa Procurador-General na februari 2021. Punto di salida di e richtlijn aki ta cu posesion di arma di candela, municion y magazijnnan di bala ta forma un gran peliger pa orden publico y seguridad.

E haltura di e exigencia ta wordo determina, entre otro, pa e tipo di arma di candela, e circunstancianan bao di cual e arma a wordo haya y eventual condenan anterior di e sospechoso. E richtlijn ta haci diferencia entre locual ta yama “posesion pasivo” (rustig bezit) y tin un arma di candela den e dominio publico, manera riba caya of, por ehempel, den un auto of un boto.

Pa armanan di candela mas pisa of automatico tin criterionan di referencia mas severo pa loke ta e demanda di castigo. Tambe recidivismo, caminda un persona a yega di wordo condena caba pa posesion di arma di candela, ta wordo considera un circunstancia agravante.

Den casonan unda ley ta permiti, Ministerio Publico por haci uso di snelrecht. Snelrecht ta encera cu e sospechoso ta wordo presenta dilanti hues den un tempo hopi cortico, pa por tuma accion rapido y visibel contra posesion prohibi di arma di candela. Pa loke ta bay 2026, dies sospechoso a wordo condena via snelrecht pa motibo di posesion di arma di candela.

Posesion di arma di candela no ta wordo tolera. Ken cu dicidi di tin un arma di candela den su poder mester conta cu e chens di castigo di prison. P’esey, Ministerio Publico lo sigui actua cu firmeza contra tur persona cu haci su mes culpabel na posesion di arma.