Dos hoben ta perde nan bida. Un taxista atraca y maltrata. Atraco riba joyeria.

Den e transcurso di poco siman, Aruba a registra un cantidad alarmante di incidentenan violento: dos hoben a perde nan bida den tiroteo, un taxista di mas di 60 aña a wordo atraca y maltrata na Cumana, y Gems Jewelry na Palm Beach a wordo atraca door di dos persona arma cu a huy riba un scooter. Tur esakinan den un periodo cortico.

Parlamentario Rocco Tjon ta expresa su preocupacion serio tocante e situacion di siguridad riba nos isla y ta haci un yamada urgente na Gobierno pa transparencia completo riba e estado actual di nos instrumentonan di siguridad publico.

Un sistema di siguridad efectivo ta consisti di mas cu polis riba caminda. E ta inclui camaranan di siguridad strategicamente situa, radarnan operacional y e infrastructura tecnologico necesario pa detecta y preveni criminalidad. Tur esakinan ta instrumentonan cu ta exigi mantencion regular y cumplimento continuo di obligacionnan financiero.

Bou di Gabinete Wever-Croes, e infrastructura tecnologico di siguridad a wordo lanta completamente. Camaranan a wordo instala, radarnan a wordo poni operacional y e presupuesto di husticia a wordo aumenta substancialmente cada aña. Pa nos, inversion den siguridad no ta un gasto, e ta un obligacion di Gobierno. E resultado tabata bisto y cifranan a demostra cu Aruba a bira e pais mas sigur den Caribe.

Sinembargo, den maart 2025 Gobierno a anuncia cu nan lo introduci un recorte di 10% riba e departamentonan di husticia. E departamentonan mes a bisa cu e recorte lo ta devastador pa nan capacidad operacional.

Nos comunidad ta puntra debidamente ta kico ta pasando. E pregunta ta legitimo: ta con e estado actual di e camaranan di siguridad riba nos isla ta? E radarnan ta operacional? Tur e obligacionnan financiero relaciona cu e infrastructura tecnologico aki ta ‘up and running’? Si no, pakico no?

Siguridad publico no ta algo cu bo ta sende paga segun conveniencia politico. E ta un sistema cu mester wordo sosteni tur dia, cu inversion, cu mantencion, y cu cumplimento di obligacionnan financiero sin excepcion. Ora gobierno ta corta den e presupuesto di husticia, e consecuencianan ta concreto. Nan tin cara, nan tin nomber, y nan tin famia cu ta yora.

Pa e motibo aki, Parlamentario Tjon ta pidi Presidente di Comision Permanente di Husticia, sr. John Hart, pa yama un reunion di comision pa Minister di Husticia por bin responsabilisa su mes riba e estado actual di nos instrumentonan di siguridad, e estado di e infrastructura tecnologico, y e consecuencianan di e decisionnan presupuestario tuma desde maart 2025.

Pueblo di Aruba merece un contesta cla. Nos comunidad merece siguridad berdadero. E minimo cu nos por haci ta garantisa cu tur sistema cu nos a construi hunto ta funcionando mane mester ta.