Fraccion MEP a haci preguntanan por escrito na e minister encarga cu Labor, Wendrick Cicilia, a base di e reciente Economic Outlook – Real Sector, September 2026 di Centrale Bank di Aruba (CBA).
Den su rapport, CBA ta señala cu falta di trahadornan ta un problema structural importante pa e economia di Aruba. Segun CBA, 62% di e empresanan ta considera e falta di trahadornan como grave, mientras cu 54% ta spera cu e problema lo empeora den un te dos aña.
Fraccion di MEP a puntra Minister Cicilia pa duna claridad tocante e gravedad real di e problema. Entre otro, cuanto trahador falta actualmente, den cua sector y profesion e necesidad ta mas grandi y cuanto vacatura ta dificil of imposibel pa yena.
MEP a puntra tambe tocante e causa di e falta di trahador. Tambe ta wordo puntra cuanto trahador adicional lo ta necesario den e añanan binidero pa por sostene e crecemento economico y e inversionnan planea.
Un punto importante di e preguntanan ta e solucion structural. MEP a puntra e minister cua medida concreto gobierno ta tuma pa mehora formacion, reformacion y e conexion entre educacion y mercado laboral, y pa trece mas persona actualmente inactivo den mercado laboral.
MEP tambe ta puntra si gobierno tin un strategia integral pa mercado laboral pa e prome cinco te dies aña.
Cu e preguntanan aki, Fraccion MEP kier haya claridad tocante con grandi e problema di falta di trahadornan ta y cua ta e plan concreto di gobierno pa resolve esaki structuralmente.
