Fraccion di MEP a reuni cu e directiva di Hospital pa trata e situacion financiero y e posibel consecuencia pa e continuidad di cuido di salud. Hospital a indica cu, sin fondo adicional, por tin necesidad pa limita of hasta stop cierto servicionan di duna cuido. Ya caba tin un sala di operacion cera, y cierto testnan pa patientnan ta keda posponi.
Di otro banda, Minister di Salud, Mervin Wyatt-Ras (EVP) a indica cu e kier laga haci un investigacion financiero prome cu tuma decision tocante financiamiento adicional.
Pa e fraccion di MEP, un punto ta central: e continuidad y calidad di cuido di salud pa nos ciudadanonan no mag di ta na peliger como consecuencia di incertidumbre riba e financiamiento. Control financiero y transparencia ta importante, pero esaki mester bay hunto cu accion rapido ora cu salud y bida di hende ta na peliger.
Fraccion di MEP ta sigui e desaroyo di e situacion di cerca y ta exigi di e minister pa duna claridad y pa tuma medida concreto pa garantisa e continuidad di e cuido di salud pa esnan cu mester di dje.
