Ombudsman, Sra. mr. Jurima Bryson a ricibi varios melding tocante e proteccion y cuido di habitantenan di institucionnan priva di cuido y estadia y institucionnan similar na Aruba. Tambe a aparece varios publicacion den prensa tocante e situacion dentro di e institucionnan aki. Esaki no ta trata solamente di casnan pa adulto mayor, pero tambe di institucionnan caminda personanan sin hogar, personanan cu problema di adiccion y personanan cu ta recuperando di adiccion ta haya luga pa keda y biba.
E personanan aki ta den un posicion vulnerabel y dependiente debi na nan edad, condicion fisico of psicologico, circunstancianan social of problematica di adiccion. Pa e motibo aki ta mas dificil pa e habitantenan aki por defende nan derechonan y interesnan of trece posibel abuso of iregularidad dilanti.
E dependencia di habitantenan tin consecuencia pa e proteccion di nan derechonan y interesnan. Nan ta depende pa gran parti di e institucion pa estadia, cuido, guia, tratamento, alimentacion, cuido medico y seguridad. P’esey, ta di gran importancia pa gobierno proteha nan derechonan y interesnan y garantisa un estadia, cuido, guia y tratamento adecuado, sigur y humano.
Esaki ta den linea cu e norma di conducta apropia di cuido special, cu ta prescribi cu institucionnan y gobierno mester proteha e dignidad humano, derechonan fundamental y seguridad fisico y psicologico di habitantenan. Ta importante cu señalnan di posibel situacionnan di abuso of iregularidad ta wordo ricibi na tempo, evalua cu seriedad y, caminda ta necesario, investiga y monitorea.
Den e cuadro di a señala e situacion aki, Ombudsman a manda un carta di preocupacion pa Minister di Transport, Integridad, Naturalesa y Asuntonan di Mayornan, responsabel pa e Ministerio di Salud Publico, Asuntonan Social, Cuido pa Mayornan y Cuido pa Adiccion, Sra. drs. M.G. Wyatt-Ras.
Como institucion independiente y imparcial, Ombudsman a presenta varios punto di atencion tocante e proteccion di habitantenan di institucionnan priva di cuido y estadia.
Esaki ta trata, entre otro, estadia adecuado, conocemento y experencia, personal capacita y suficiente, supervision y cumplimento di normanan, posibilidadnan accesibel pa reporta y proteccion legal, y continuidad di cuido adecuado.
Mas informacion tocante esaki ta disponibel den e carta di preocupacion tocante e proteccion y cuido di habitantenan di institucionnan priva di cuido y estadia. E carta completo ta disponibel riba website di Ombudsman, www.ombudsman.aw/pa/publicacion/.
Bureau Ombudsman ta tene publico al tanto di tur desaroyo via su canalnan di comunicacion:
Facebook: Ombudsman Aruba
Instagram: ombudsmanaruba
LinkedIn: Ombudsman Aruba
Website: www.ombudsman.aw
