Comunicado di prensa: Parlamentario Pieters ta boga pa transforma KIA den un instituto cu realmente ta cambia bida

Cada detenido den Korrectie Instituut Aruba (KIA) ta costa aproximadamente Afl. 300 pa dia na e pueblo di Aruba. Segun nos tin no mas cu 300 preso, pues ta representa Afl. 90 mil pa dia y Afl. 32.85 miyon pa aña. Pero pa parlamentario Eduard Pieters (PPA), e pregunta cu pueblo mester haci no ta solamente cuanto placa nos ta gastando.

E pregunta ta: Kico Aruba ta ricibi back pa e inversion aki? Segun e lider di fraccion di PPA, e contesta ta preocupante.

Un prison cu no ta prepara pa un di dos oportunidad

Durante su declaracion den Parlamento, Pieters a señala un realidad cu, segun e, no por sigui ignora. KIA no por limita su funcion na custodia solamente. Su mision tambe ta rehabilita y prepara e personanan pa bolbe sociedad. Sinembargo, e realidad ta otro. Solamente dos psicologo. Solamente dos trahador social. Espacio limita pa programa di desaroyo. Y hasta e oportunidad pa presenta Landsexamen a wordo elimina. “Con nos por papia di baha recidivismo si nos ta kita e instrumentonan cu precisamente por cambia e futuro di un persona?”

Rehabilitacion no ta gasto. Ta inversion den seguridad

Segun Pieters, cada preso cu sali di KIA sin educacion, sin tratamento y sin preparacion pa reintegra, ta representa un riesgo pa sociedad y un costo cu eventualmente lo bolbe na pueblo. P’esey, segun Pieters, rehabilitacion no mester ta mira como un luho. Ta e inversion di mas inteligente cu un pais por haci, pa reduci recidivismo y aumenta siguridad. “Si nos no cambia bida den KIA, nos no por spera resultado diferente, ora e persona sali pafor.”

Seguridad no ta caba na e porta di KIA

Pieters a conclui cu e berdadero exito di un instituto coreccional no ta midi solamente den con e ta mantene hende paden.

E ta midi den cuanto hende no mester bolbe (recidivismo). “Nos por sigui gasta miyonnan pa mantene un sistema cu solamente ta castiga, of nos por cuminsa inverti den un sistema cu realmente ta cambia bida.”

Pa Eduard Pieters, e pregunta pa Aruba ta simpel: Nos kier un prison cu ta solamente warda e personanan, of nos kier un instituto coreccional cu realmente ta proteha e futuro di nos comunidad?