Ayera den oranan di mainta y merdia, henter isla di Aruba a confronta un blackout cu a dura algun ora. Minister di Energia, Sr. Glenbert Croes a reacciona bisando cu a “duna instruccion pa bini un claridad definitivo riba e problematica aki.”
Pasa di 11or di mainta, NV Elmar a publica un anuncio riba su pagina di Facebook despues cu Aruba a confronta cu e blackout.
“Atencion na nos clientenan: Black-out ta trata di un interupcion den produccion di coriente den planta di WEB. Nos tecniconan ta keda ‘stand-by’ pa asina cu WEB soluciona e problema, cu nos por cuminsa suministra coriente back,” e compania a indica.
Tiki despues di e comentario di Elmar, WEB Aruba NV a publica: “Atencion: a surgi un storing den planta di produccion di WEB Aruba, cual a conduci na un blackout, lagando nos isla sin coriente. E causa ainda no ta conoci. Nos tecniconan ta haciendo tur esfuerso pa remedia e storing mas liher posibel. No ta conoci ainda con largo lo dura pa recupera suministro di coriente. Nos disculpa pa e inconveniencia.”
Ambos compania den e siguiente oranan a publica updatenan riba barionan cu a cuminsa haya coriente back. Sinembargo, no a duna ningun splicacion riba e causa di e blackout.
Di su banda, minister di Energia, Glenbert Croes a comenta riba e suceso den un comunicado di prensa.
“Minister di Energia Glenbert Croes ta lamenta e blackout y ta para firme pa un solucion definitivo.
E mandatario di Energia a tuma nota di e blackout cu a tuma lugar diabierna mainta pa merdia y ta lamenta esaki. E impacto di un blackout ta grandi pa economia di Aruba y ta algo cu a bini ta sucediendo frecuentemente. Minister Glenbert Croes a duna instruccion pa bini un claridad definitivo riba e problematica aki. Minister Croes ta para firme cu mester bin un solucion y a corto plaso lo traha riba esaki.”
Mientras tanto, riba rednan social tanto local como turista a expresa nan disgusto pa cu e situacion, cual a afecta comercio y a laga turistanan pafo di aeropuerto.
