Cantante y compositor Jossy Brokke ta celebra 65 aña den e mundo di franadula y pa e gran celebracion aki, Go Cultura Foundation Aruba ta organisa un concierto cu lo bira un homenahe, riniendo tributo musical na e baluarte local Jossy Brokke.

Sr. Edjean Semeleer di Go Cultura Foundation Aruba a indica cu e grandioso concierto aki lo tuma luga dia 1 di december den Cas di Cultura, cu lo ta un concierto di gala cu un elenco grandi di artistanan local, cantantenan local, musiconan local cu lo bay presenta e cancionnan componi pa Jossy Brokke y obviamente Sr. Jossy mes como cantante lo t’ey presente e anochi aki pa presenta su musica.

Sr. Semeleer a splica cu parti di e proyecto aki tambe lo ta un documentario biografico di Sr. Jossy cu Go Cultura Foundation lo bay estrena den e prome mita di aña 2022. “Nos kier gradici tur organisacion y tur compania cu ta formando parti di e proyecto aki cu ta brindando nan sosten y vooral sosten financiero pa asina e proyecto por bira un realidad”, el a agrega.

Fundacion UNOCA tambe ta forma parti di e team cu ta brinda nan sosten na e gran evento aki y directora di e fundacion, Srta. Ray-anne Hernandez, tambe tabata presente. El a indica cu pa UNOCA sigur e ta un placer y un honor pa por forma di e proyecto grandi aki cu ta celebrando Jossy Brokke su 65 aña den farandula.

“Pa nos sigur ta importante cu nos por sostene proyectonan cultural y mas aun den e caso aki cu ta trata di un baluarte den musica, den composicion, cantamento, un persona cu su voz a resona na Aruba, na Corsou, na Boneiro y internacionalmente tambe a pone nos nomber riba mapa di mundo”, el a expresa.

E meta di fundacion UNOCA ta pa sigui stimula cultura di Aruba y pa sigui sostene proyectonan di e magnitud aki, y manera segun Srta. Hernandez a indica, e concierto aki no ta un proyecto cu solamente ta honra un baluarte local, pero tambe ta un proyecto caminda ta trese e musica di Jossy Brokke den bista atrobe y caminda cu e hobennan tambe por conoce su musica y asina traspasa e herencia musical.

Representante di Departamento di Cultura, Sr. Stanley Dabian, tambe tabata presente y expresa cu e pa Departamento di Cultura e homenahe aki pa Sr. Jossy Brokke ta hopi importante pasobra pa Departamento di Cultura educacion di arte y cultura ta un prioridad y Sr. Jossy Brokke, como un baluarte y un vos di oro di Aruba, ta importante pa continua cu e herencia artistico y cultural.

“Ta importante pa nos aprecia nos hendenan, aprecia nos baluartenan cultural y asina duna nan esaki na bida. Otro cos bunita di e concierto aki tambe ta cu bo ta bay tin e traspaso di generacion pa otro generacion pasobra ta hopi importante pa nos musica, nos cultura bo apreci’e, bo promove, bo conta otro di dje, pero principalmente stima nos hendenan”, Sr. Dabian a bisa.

Srta. Federika Sydow, representante di Bodegas Papiamento y CAVA Aruba, cu tambe ta un sostenedor di e proyecto aki a indica cu di parti di Bodegas Papiamento y CAVA Aruba, “nos ta hopi contento di ta parti di un proyecto asina grandi, asina special y nos ta kere den iniciativa cu ta aporta un plataforma pa asina trece tur nos artistanan hunto y inspira nos comunidad. Nos kier engrandece e cultura di Aruba”.

Protagonista di e gran concierto di homenahe aki, Sr. Jossy Brokke tambe a expresa algun palabra. “Pa mi ta un gran placer pa mi por manda un saludo y abraso na bosonan y mi ta priminti bosonan cu den locual mi ta sobra di bida mi ta bay traha bastante mas composicion y disco pasobra tin mas caminda pa pone mas cultura y manera mi amigo Edjean Semeleer a caba di haci cu mi persona, e tin den su cabes tambe pa yuda tur artista na Aruba lo mas tanto cu e por”.

LEAVE A REPLY

Please enter your comment!
Please enter your name here