Banco Central di Aruba (BCA) recientemente a conclui e encuesta di percepcion di negoshi pa e di promer trimester di 2021. E encuesta di percepcion di negoshi ta evalua e percepcion economico y confiansa di e negoshinan local, como tambe e impacto continuo causa pa e pandemia di COVID-19 riba condicionnan economico y actividadnan di negoshi.

E asina yama ā€˜Business Perception Indexā€™, cu ta consisti di e indicenan di condicionnan economico actual y condicionnan economico a corto plaso, a crece cu 1,4 punto di indice te na 97,3 durante e di promer trimester di 2021. E ā€˜Business Perception Indexā€™ total ta keda bou di 100, a pesar di un mehoracion den confiansa di negoshinan, compara cu e trimestre anterior (Grafiek 1)[1]. E mehoracion aki ta debi na un adelanto den e percepcion di negoshinan pa cu condicionnan economico actual y a corto plaso.

E indice di condicionnan economico actual a expande cu 0,3 punto di indice te na 93,7 compara cu 93,4 den e di cuater trimester di 2020. E indice di condicionnan economico a corto plaso a registra un crecemento di 1,6 punto di indice, esta for di 101,1 den e di cuater trimester di 2020 te na 102,7 den e di promer trimester di 2021 (Tabel 1). E porcentahe di encuestadornan cu ta premira un crecemento economico positivo den e siguiente 12 lunanan, a nota un subida substantial, esta di 10,8 punto di porcentahe te na 26,5 porciento.

Pa locual ta e impacto causa door di e pandemia di COVID-19, BCA a amplia e encuesta di percepcion di negoshi, pa asina tambe evalua e percepcion riba su impacto ariba benta di negoshinan, necesidad pa aplica pa fondonan di emergencia y e expectativa di recuperacion economico.

Mas cu 40 porciento di e negoshinan den e encuesta (44,7 porciento) a indica cu e pandemia di COVID-19 a sigui tin un impacto significante riba e benta di nan negoshi, esta 0,7 punto di porcentahe mas compara cu e di cuater trimester.

E informe completo di e encuesta di percepcion di negoshi ta disponibel riba website di BCA (https://www.cbaruba.org/).

  1. E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu negoshinan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di negoshinan ā†‘

LEAVE A REPLY

Please enter your comment!
Please enter your name here