Minister Otmar Oduber a evalua di entrega su retiro pa motibo di un conflicto riba carnaval, specificamente riba e organisacion di e evento di musica Caiso y Soca Monarch. Pero awe nochi gobierno a saca un comunicado bisando cu tin un solucion riba mesa.
No ta conoci si e ultimo noticia aki lo nifica tambe cu minister Oduber a cambia di pensamento di entrega su retiro. E discusion den gobierno a cuminsa momento cu e fundacion Musica a pidi permiso pa organisa e evento menciona ariba y cu den Conseho di Minister tabata evalua esaki sin cu minister Oduber tabata na altura di esaki. Esaki a trece henter un discusion pa motibo cu SMAC ta encarga cu e organisacion di tur evento di carnaval.
Aki bou por lesa e relato completo cu gobierno a manda finalmente, indicando cu tin un solucion: “Gobierno di su banda lo reconoce e acuerdo aki entre SMAC y MUSICA y duna cooperacion completo na MUSICA pa haci e evento posibel.” (potret ganadonan di Caiso y Soca Monarch 2015)
Gobierno a presenta solucion na SMAC Y MUSICA
ORANJESTAD – Relaciona cu carta fecha 15 di December di MUSICA Organization y reciente corespondencia entre SMAC y MUSICA gobierno di Aruba a confirma na tur dos fundacion su esfuersonan pa hunto haci nos Carnival exitoso manera semper Aruba ta conoci p’e.
Pa locual ta trata e claridad rond di organisacion di Festival di “Aruba Caiso and Soca Monarch” gobierno a compronde cu entre SMAC y MUSICA tin un proposicion cu por worde realisa cu algun punto di claridad di parti di gobierno.
Gobierno a constata cu SMAC y MUSICA ta dispuesto pa yega na un acuerdo riba organisacion dor di MUSICA di “Aruba Caiso and Soca Monarch 2016”. Pa claridad riba asunto di permiso y tambe cooperacion di gobierno ambos organisacion a pidi un decision di gobierno.
Gobierno pa medio di un carta firma pa Prome Minister di Aruba a informa ambos organisacion cu gobierno ta mira e solucion den un acuerdo di cooperacion proponi entre SMAC y MUSICA riba e organisacion di “Aruba Caiso and Soca Monarch 2016” dor di MUSICA cu cooperacion di SMAC (como esun cu a haya e permiso di gobierno pa organisa e evento aki e aña aki).
Gobierno di su banda lo reconoce e acuerdo aki entre SMAC y MUSICA y duna cooperacion completo na MUSICA pa haci e evento posibel.
.JPG "Sra. Yvette Geerman di Dep. di Higiena: “Ley ta bisa cu si no tin carchi di salud na ordo, bo no por bende cuminda”")
