Den ultimo dianan e problemanan na Colegio Arubano a haya nan caminda pa prensa cu mas frecuencia. E siman aki mes tabatin un reunion di e docentenan, unda un miembro di directiva di e fundacion gobernante kier tabata presente, pero esey no a ser aprecia y un parti di e docentenan a bay na otro lugar pa reuni. Actualmente tin e incertidumbre di con scol lo mester habri dialuna venidero, loke a hiba na hopi trafico riba rednan social.

Sin embargo, tin hopi mas asunto cu ta hunga un papel na e scol aki. Banda di e lucha pa por tin un management funcionando bon den ultimo añanan, unda a ‘gasta’ dos rector Hulandes plus dos rector local, di cual e ultimo a renuncia recientemente, tin otro asunto riba tereno organisatorio cu a capta nos atencion.

Promer cu tur cos, en corto e organisacion principal ta Stichting Voortgezet Onderwijs Aruba, anteriormente yama Stichting Middelbaar Onderwijs Aruba. Esaki a conoce varios cambio di su statuutnan, unda por mira cu gradualmente e influencia di Obispado a bira menos den e directiva di e fundacion. Actualmente e directiva conoce un maximo di 7 y un minimo di 3 persona, di cual un miembro ta nombra pa e asociacion di mayor (OCCA), y un miembro pa Obsipo di Willemstad. E demas miembronan ta keda nombra “bij cooptatie”, loke significa cu e miembronan actual ta dicidi ken por drenta e fundacion pasobra ta nan ta invita un persona pa bira miembro. Riba su mes nada straño, pasobra esey ta pa evita ‘asalto’ di pafor manera si por sucede den un asociacion (vereniging). Pero e ta significa si cu ningun hende o organisacion di pafor tin algun influencia den e organisacion, ora cos no ta bay bon.

Un di e desaroyonan paralelo cu a tuma lugar mientras tanto tin di haci cu e fondo di buki (Boekenfonds). Desde hopi aña Colegio Arubano tabata conoce un ‘boekenfonds’ cu tabata un alivio grandi pa hopi mayor, sigur esunnan cu tabatin mas cu un yiu na e scol ey, pasobra e total di loke nan mester paga por surpasa facilmente nan recursonan. Esaki tabata funciona como parti di e trabao di e scol, directamente bao di e fundacion cu ta dirigi e scol, cu ta Stichting Voortgezet Onderwijs Aruba.

Na fin di 2019, e actual directiva di SVOA a lanta un otro fundacion yama Stichting Pro SVOA (SPS) cu tin como meta recaudacion di recursonan (financiero) na beneficio di e fundacion cu ta opera e scol, cu ta SVOA. Aki ta bin topa cu e actividadnan di e boekenfonds cu e fundacion awor ta haci pa SVOA. E directiva actual ta e mesun personanan cu ta dirigi SVOA, pasobra e statuten ta bisa cu e miembronan di e fundacion aki ‘qualitate qua’ ta forma directiva di e fundacion cu ta opera tur loke tin di haci cu compra di material nobo, y ta hiba e comunicacion cu e proveedornan.

Riba su mes, cu ta crea un vehiculo apart cu ta maneha tur loke tin di haci cu buki y otro material di scol no ta asina straño, aunke tampoco necesario. Loke a yama nos atencion cu e fundacion nobo ta maneha e contratonan cu e proveedornan, mientras cu e presidente di ambos fundacion ta director di un di e mayor proveedornan na nos isla, loke ta crea un conflicto di interes grandi. Imagina cu e propio presidente ta maneha directamente tanto su propio ofertanan pa material como esun di un eventual competidor. Promer cu cuminsa cuestiona e posicion di e actual presidente a base di su actitud, lo ta logico pa cuminsa exigi normanan di ‘good governance’ cu di mes no ta permiti e tipo di ‘belangenverstrengeling’ aki.

Banda di tur e problemanan cu tin na e scol mes, unda segun varios fuente cu nos a consulta, di cual ningun hende kier bin dilanti cu nomber y fam, un di e problemanan grandi ta e actitud di e actual presidente, cu ta duna su mes e derecho pa drenta den local di docente mientras nan ta duna les. Un di e entrevistadonan ta yama esaki ‘e micromanagement’ di e presidente di (ambos) fundacion. Mester bisa cu esaki riba su mes ta algo inaceptable pa cualkier docente, pero mester cuminsa cu set up un organisacion nobo a base di principionan di bon gobernacion. Y e forma di maneha e fundacion y acepta sin mas e conflicto di interes aki lo mester ta e promer punto riba agenda.

LEAVE A REPLY

Please enter your comment!
Please enter your name here