Den un carta dirigi na gezagheber Edison Rijna, Consehal Daisy Coffie di Fraccion Coffie ta duna di conoce cu ‘Washington Slagbaai National Park Bonaire’ ta consisti di 2 parti, Washington y Slagbaai.
Washington ta pertenese na teritorio di Boneiro. Gobierno di Boneiro a duna STINAPA Boneiro esaki pa maneha. Slagbaai ta pertenese na STINAPA N.A., lesa Carmabi. Carmabi a entrega Slagbaai na STINAPA Boneiro pa maneha esaki. E kabritunan den Washington ta pertenese na herederonan di Sr. Herrera cu a bende e plantashi aki cu Gobierno di Boneiro.
E cabritonan den Slagbaai ta pertenese na STINAPA N.A. ku ta Carmabi. A negosha pa Slagbaai bini bek den posicion di Boneiro. Carmabi ta dispuesto pa hasi esaki y a duna palabra pa Slagbaai bira bek di Boneiro, pero bou di e condicion cu mester saca e cabritonan for di Slagbaai.
Den su carta sra Coffie ta referi solamente na e cabritonan den Slagbaai. Segun Daisy Coffie den transcurso di añanan STINAPA Boneiro a haci diferente accion pa por a controla i/of saca e cabritonan for di den e parke, spesialmente e parti di Slagbaai. Si e cantidat di cabrito bira mucho hopi esaki ta afecta e mondi cu ta e fuente di cuminda pa tur e bestianan cu tin den e parke.
Consecuancia ta cu e cabrito no tin sufisiente cuminda y e ta bira zwal. Cu otro palabra e mondi y e cabrito ta sufri den un situacion caminda tin mucho kabrito den e parke.
Basa riba e informacionnan aki Daisy Coffie den su carta ta haci e siguiente preguntanan: Gobierno ta na altura di disponibilidad di STINAPA N.A./Carmabi pa pasa posecion di Slagbaai bek pa teritorio di Boneiro? Gobierno ta na altura cu un di e exigencianan di STINAPA N.A./Carmabi ta pa sac e cbritoan for di Slagbaai? Si tin corespondencia riba e puntonan aki ta posibel cu nos di Konseho Insular por risibi esakinan? Gobierno ta di acuerdo cu kier saca e cabritonan for di Slagbaai? Gobierno ta di acuerdo pa wak e maneho di STINAPA Boneiro pa saca e cabritonan for di Slagbaai mas di aserca y evalua esaki? Gobierno ta na altura cu actualmente den cuadro di saca e cabritonan for di Slagbaai ta tira esakinan mata? Gobierno ta di acuerdo pa averigua serca STINAPA Boneiro mas detaye tocante e maneho aki? Nos tin informacion cu tin ocacion caminda ta tira cabrito y ta laga e cadaver benta pa descompone den mondi. Gobierno ta na altura di e actonan aki? Si esaki ta cuadra, Gobierno ta di acuerdo cu ta tira cabrito y laga e cadaver benta den mondi? Gobierno ta di acuerdo cu esaki no ta un maneho responsabel si nos tene cuenta cu nos tin famianan cu ta biba den pobresa sin cuminda adekua pa come tur dia? Kico Gobierno ta dispuesto pa haci den tal caso manera deskribi aki riba?
Mas aleu den su carta na gezagheber Rijna sra Coffie ta puntra tocante e permitnan conserni pa tira cabrito y dicon no ta hunta e cabritonan, hiba nan matadero y usa nan como alimento pa nos hendenan. Tambe e konsehal kier sa si tin un maneho relashona cu criamento di cabrito aki na Boneiro. Segun informacion tiramento di cabrito ta tuma luga ora cu tin bishitante den e parke y ta indica esaki cu un bandera cora anto cu e bishitante ta drenta riba propio riesgo den parke y sra Coffie ta supone cu ta avisa bishitantenan tambe cu tin tiramento. Relashona cu esaki sra Coffie ta puntra si gobierno ta na altura di e manera di opera aki, si gobierno ta di acuerdo y ta aproba e manera di opera aki y si gobierno no ta di acuerdo, kico ta e pasonan cu Gobierno ta dispuesto pa tuma?
Na final di su carta Daisy Coffie ta indica di kier duna un contribucion tambe na e situacion aki. E konsehal ta kere cu ta difícil pa caba cu tur cabrito den Slagbaai, pero tambe cu mester controla e cantidad di cabrito.
Esaki ta bon pa e mondi cu ta fuente di cuminda pa e bestianan y esaki ta bon pa e cabritonan tambe. Mas saludabel e mondi ta mas saludabel e cabritonan tambe ta. Pa controla e cantidad di cabrito sra Coffie ta propone un sistema caminda ta duna un tipo di lisencia na esnan cu kier coi e cabritonan den Slagbaai.
Naturalmente un lisencia asina mester ta mara na regla p.e. con ta coi cabrito, ki ora ta coi cabrito, con ta atende cu e cabrito pero tambe cu e mondi. Asina STINAPA Bonaire por tin control riba e situacion y e coimento di cabrito. Esaki tin mas bentaha tambe: E hendenan por haña cabrito pa nan come. Ta evita hortamento di cabrito. STINAPA Bonaire por tin kontrol riba cuanto cabrito ta saca for di Slagbaai. E mondi por coi forsa y asina tin mas alimento pa e bestianan. Por evita tiramento cu tur consecuencia cu esaki por tin.
Terminando su carta Daisy Coffie ta spera cu Gobierno ta usa su influencia pa atende e asunto aki prome ku insidentenan lamentabel sosode.
