Conseho di minister ta aproba: aña nobo ta habri cu Cannabis/CBD oil legalisa

Pa januari 2019 Aruba lo conoce un stap grandi den direccion di legalisa y decriminalisa cannabis medicinal, desde momento cu conseho di minister a aproba pa haci un di e productonan di cannabis legal. Segun parlamentario Ricardo Croes (RED), un compania local, Visser Trading, ya caba a subi riba lista pa por importa e producto aki.

E noticia aki minister di enseñansa, ciencia y desaroyo sostenibel Rudy Lampe (RED) a trece como primicia riba un sesion di Facebook Live riba su pagina, cu parlamentario Croes y Kinsasha Thielman-van der Bliek presente. Sr. Croes a trece dilanti varios anecdota relaciona cu e tema di cannabis, unda e ta subraya cu partido RED ta conta cu sosten di varios minister riba e asunto di cannabis medicinal pero tambe desaroyonan internacional cu ta mustra cu partido RED ‘tabatin rason’.

Estados Unidos ta legalisa Hemp

Cu presidente Trump su firma bou e Agriculture Improvement Act 2018, e mata cual ta mescos cu e mata di cannabis pero cual no ta contene e substancia psicoactivo THC lo keda pafo di e hurisdiccion di e Drug Enforcement Administration, mirando cu a kita esaki di e lista di substancianan controla, treciendo e mata su status mas cerca na esun di cualkier otro producto agricultor. Esaki segun fuente Ministry of Hemp.

Mirando esaki sr. Croes a subraya tambe cu minister di economia y finanzas Xiomara Ruiz-Maduro (MEP) a expresa na cierto momento den reunionnan publico na parlamento ultimo tempo cu ‘cannabis lo bira e pilar economico nobo’. “E palabranan ey a cay manera musica pa mi horea, pasobra Ricardo Croes y partido RED a haya rason. Nos a bisa cu e pilar economico aki ta e pilar economico pa pais Aruba. Ademas di e balor economico por medio di export, nos a wak tambe e balor agrega pa nos propio comunidad, pasobra no tur cos ta placa.” Sinembargo e parlamentario a agrega cu e companianan cu kier genera ganashi por medio di cannabis ‘tambe nos tin mester di nan’ , di cual el a splica cu e prome cu a subi riba lista ta Visser Trading.

Ministernan ta sostene cannabis medicinal

Cu habrimento di aña 2019 tambe lo cuminsa bin un prohibicion riba diferente tipo di plastic, entre otro e foam boxnan cu por bisa ta casi un fenomeno cultural. Sr. Croes a splica cu na momento cu esaki tuma luga un industria nobo lo por surgi di tur e productonan aki cu te hasta lo por produci localmente ora yega asina leu. Pero e lider di fraccion di RED a pidi mientrastanto pa e companianan ‘por favor pensa riba madre tera’ y busca productonan di plastic traha di hemp of otro material biodegradabel.

Podise e industria aki cu parlamentario Croes lo yega mas lihe cu ta di spera, mirando cu minister di sector primario Chris Romero a cera un MoU cu un compania pa trece e concepto di Vertical Farming na Aruba, specificamente pa cannabis, segun sr. Croes.

E parlamentario a refleha tambe na un expresion di minister di asuntonan social Glenbert Croes (MEP) unda e minister a conta sr. Croes cu e tambe ‘ta di acuerdo cu e drug test pa uzo di marijuana no ta real y no ta to the point pasobra e no ta sirbi e proposito di e drug test cual ta siguridad riba pia di trabou y cu e persona mester ta intoxica, den sentido cu su intoxicacion ta crea peliger pa trabou’.

Comparando un bes mas cu alcohol, e parlamentario a splica cu hasta alcohol ley ta permiti pa ta den bo sistema mientras ta core auto of na trabou, solamente cu ley a pone un limite na e cantidad cu por tin den bo sistema. “E no a prohibi bo pa tine den bo sanger. Awo e drug test ta mustra cu bo tin cannabis den bo sistema pero e no por mustra cu e cantidad cu bo tin ta haci bo un peliger riba pia di trabou. Pues nan no sa si ta 3 siman pasa bo a huma un joint of uza un druppel di azeta. Pues danki na minister Glenbert Croes pa e sosten ey.”

You May Also Like

Cada aña tin alrededor di 44 caso diagnostica di cancer di prostaat

Presidente di Fundacion Contra Cancer di Prostaat, Jurgen Benschop, a indica cu e situacion ...

Gobierno ainda skeptico riba Citgo su promesanan

A pesar cu prome minister, Evelyn Wever-Croes (MEP) a cualifica como positivo e reunion ...

Presidente di STA, Diego de Cuba

Sindicato STA: Arubus tin rason pa bay den accion

ORANJESTAD –Ayera e trahadonan di Arubus a dicidi di bay den accion pa mustra ...

Departamento di Aduana ta splica ariba e proceso di ‘Vrijmaking’

Vocero Departamento di Aduana Marilyn Wout a reuni hunto cu mas miembronan pa duna ...

Fundacion CineAruba: ‘Acceso na fondonan ta bira menos despues di tempo’

Fundacion CineAruba den aña nobo ta spera cu gobierno lo duna contesta riba nan ...

meverly romano.JPG

Departamento di Impuesto druk cu cliente entregando declaracion di inkomstenbelasing

ORANJESTAD – Mayan ta e ultimo dia cu por haci entrega di inkomstenbelasting of peticion ...