(EFE) – Conseho Nacional Electoral (CNE) ta bay studia un ponencia di dos magistrado cu ta recomenda formula acusacionnan contra e presidente Colombiano, Gustavo Petro, pa presunto financiacion iregular di su campaña, decision cu e mandatario a califica como comienso di un “golpi di Estado.”
E ponencia di e magistradonan Alvaro Hernan Prada, ex-congresista di partido derechista Centro Democratico, y Benjamin Ortiz, ex-secretario general di CNE, tambe pidi formula acusacionnan contra Ricardo Roa, presidente di e compania estatal Ecopetrol y ken tabata gerente di campaña di Petro na 2022.
E documento ta bay ser discuti pa nuebe magistrado di CNE den un sesion di sala pleno, den cual lo dicidi si ta admiti of no pa continua cu e proceso, na unda nan tin mester e voto di por lo menos seis magistrado.
E decision di CNE no a cay den bon tera pa Petro, ken den un discurso na Cartagena a yama un lantamento popular den su defensa pa motibo cu e ta considera cu a “kibra e orden constitucional.”
“Miyones di Colombiano tin cu sali riba caya, mi ta invita nan y solicita nan independientemente di kico lo pasa cu mi, pa rondia e centronan di poder di Colombia tanten lo reestablece e orden constitucional na e pais aki,” el a expresa.
E caso contra campaña presidencial di Petro a cuminsa na februari 2023 ora CNE a dicidi di habri un investigacion preliminar pa presunto iregularidadnan den su financiacion den base na un “denuncia anonimo.”
Na e momento ey, e organismo a splica cu e keho a ser presenta pa “presunto iregularidadnan den e financiacion y presentacion di rapportnan di entrada y gastonan di e campaña electoral di prome y di dos buelta presidencial di Pacto Historico, coalicion di iskierda cu a hiba Petro na Presidencia na 2022.”
Petro a manifesta cu esaki ta e comienso di un “golpi di Estado” debi cu “Constitucion ta bisa cu presidente di republica no por ser husga pa un entidad diferente na Comision di Acusacion di Camara di Representante.”
CNE a rechasa e declaracionnan di e mandatario y ta considera cu ta pone den riesgo su magistradonan.
“E declaracionnan grave contra miembronan di e corporacion aki ta kibra e funcionamento normal di sistema democratico y ta pone den riesgo esnan cu ta encarga di tuma decisionnan den cumplimento di nan funcionnan constitucional,” CNE a señala den un comunicado.
E ponencia di e dos magistrado di CNE a dividi opinionnan di e pais, na unda ex-presidente Andres Pastrana (1998-2002) a skirbi riba su rednan social “Gustavo Petro a bo a cuminsa e golpi cu entrada di placa ilicito na bo campaña y e violacion evidente di e reglanan electoral fiha pa ley.”
Di su parti, Alejandro Gaviria, ken a fungi como prome minister di Enseñansa di Petro y awor ta un di su opositornan mas grandi a afirma cu “Si cualkier investigacion ta rechasa y ta señala como un “golpi chikito”. E pretension di presidente Petro ta evidente: impunidad absoluto. E kier impone su mes riba ley.”
Aliadonan di presidente a critica e decision ora ta considera cu ta supone “un evidente intento di kiebro constitucional y posibel golpi di Estado huridico,” e senador Maria Jose Pizarro a señala.
