Diahuebs 9 di september, Prome Minister Evelyn Wever-Croes a ricibi bishita di Consul General di Venezuela señor Mata y señora Lugo. E motibo di e bishita aki ta cu señor Mata ta preparando pa tuma encargo na otro pais, na Qatar pa representa Venezuela y p’esey a bin un reunion mas bien di despedida.

Den nomber di Gobierno di Venezuela, señor Matos a gradici Gobierno di Aruba pa tur e cooperacion cu Consul por a traha durante ultimo 4 añanan na Aruba pa atende cu interesnan di e Venezolanonan cu ta biba aki na Aruba y cu ta biba den region.

“Nos a delibera riba diferente punto, Consul Mata a trece padilanti cu e desaroyo na Venezuela ta bayendo hopi positivo y a pidi un biaha mas pa reapertura di e frontera. Den nomber di Gobierno di Aruba nos a indica di ta trahando riba esaki, nos ta evaluando un apertura gradual di frontera. Pa cuminsa cu e apertura di frontera maritimo pero mester tin palabracionnan hopi concreto haci cu Venezuela adelanta p’asina e reapertura por ta na un forma sigur. Pa Aruba siguridad ta e punto principal. Si por yega na otro cu e palabracionnan aki cu e reapertura por bay na forma sigur, e ora Aruba no tin problema pa reapertura di frontera”, Prome Minister a duna di conoce.