Consumidonan tin necesidad di un comite di conflicto pa defende nan derechonan

Amanda Maduro

E necesidad di bin cu un geschillencommissie of comite di conflicto pa atende cu e derechonan di e consumidor ta un prioridad.

E hurista y actual PR di departamento di Asunto di Consumido Amanda Maduro a declara na  Bon Dia Aruba cu nan a yega di tene un reunion cu minister Richard Arends di Asuntonan Economico riba e topico aki y e necesidad di dje.

E anterior PR, Luciano Maduro (d.f.m.) a haci un encuesta pa haya sa si consumidor ta sinti e necesidad di un alternativa pa yega na  resolve e problema cu e consumidornan tin. E resultado di e encuesta a bin resulta cu hopi hende ta sinti cu ta falta un alternativa of geschillencommissie  pa yega na nan derecho. E ta haya cu ta existi mas cu un posibilidad. Ya cu aworaki e departamento aki ta hopi limita den instrumentonan legal  pa defende derecho di consumidor y esaki ta algo di lamenta.

Den e reunion cu e mandatario en cuestion a keda pendiente cu nan ta bay wak e posibilidad pa bin cu un geschillencommissie of  algo similar manera nos ta conoce cu e huurcommissie. Un instancia cu e facultad aki ta haci cu un persona cu a wordo perhudica por haya nan derecho, sin mester gasta placa den abogado of caso den corte. Ya cu tin biaha e consumidor no tin e moda pa gasta suma halto ora cu su derecho como consumidor no ta wordo respeta.

Menos gasto
Un geschillencommissie  lo facilita cu e consumidor por yega na su derecho sin gasta suma halto den un caso cu ta tuma su tempo y cu e por tin su risico,  si e no ta gana e caso.  Asina e consumidor ta minimalisa loke ta wordo inverti den gasto y loke e por haya bek pa daño y perhuicio. “E ta un risico y mayoria di hende no ta tuma un risico asina, vooral den e temporada cu tur cos ta un tiki dificil y placa ta preta”, segun sra. Maduro

E ta haya cu un geschillencommissie  ta masha importante pasobra na fin di cuenta nos tur ta consumidor; y nos tur por haya nos mes den situacion asina.  Si esaki no ta posibel, tambe lo por considera un tipo di autoridad cu nan por pone presion manera esun cu ta funciona na Hulanda cu e autoridad manera Autoriteit Consument & Markt (AMC). E autoridad aki ta vigila e companianan y e consumidornan tambe por bin cu nan kehonan. Den caso cu e compania no a cumpli cu e reglanan nan por  haya un boet. Esaki ta un forma di presion pa e companianan por  cumpli cu ley.

 

You May Also Like

Carubbean y Ata.jpg

‘Carubbian Festival ta cumpli cu rapport financiero audit pa compania independiente’

Encuanto un investigacion riguroso cu ta tumando luga relaciona cu un eventual caso di ...

Simposio ta cuminsa cu analisis di corupcion den Reino

Ayera anochi a tuma luga e prome anochi di e simposio organisa conhuntamente pa ...

5april, JM, DIP.jpg

DIP: Negoshinan di deporte acuatico ta bin na remarca prome pa haya permiso

Tabata tin un palabracion cu tur compania di deporte acuatico cu tabata riba beach ...

Dump (2).jpg

Parkietenbos lo wordo cera na comienso di 2017

Entrante 1 Januari 2017  lo stop di hiba sushedad  dump y e kimamento lo ...