Conteo final coriendo riba ultimatum di Sindicatonan riba indexering

E conteo final ta coriendo y cada dia ta falta menos pa e ultimo te dia 9 di augustus venidero cu e sindicatonan di sector publico (SIMAR, SEPPA, TOPA, SPA y SADA) a duna gobierno bin cu un contra proposicion pa nan por discuti riba indexering.

E bloke sindical a pidi un indexering di 3.6% cu ta nifica un suma di alrededor di 20 miyon florin. E ta casi e mesun suma di e surplus cu gobierno –a base di e protocol firma cu Hulanda y e ley di LAft- a compromete di cumpli cune den e presupuesto 2020.

Sindicalista y vocero di e bloke sindical, Edward Maduro a laga sa cu gobierno tin dos rol cu ta maneha e pais y tambe nan ta un dunado di trabou. Den e caso specifico aki, como sindicatonan cu ta representa e trahadonan di sector publico, y logicamente nan ta acercando nan dunado di trabou pa atende cu nan derecho di indexering.

E ta haya cu ta responsabilidad di gobierno di wak con e ta negosha locual nan ta pidiendo di indexering. Si ta full e cifra aki of si gobierno ta propone otro forma pa atende cune. Pero e bloke sindical aki ta haya cu indiscutiblemente gobierno mester bin cu un contra proposicion, prome cu e ultimatum di dia 9 di augustus venidero lo wordo cumpli.

E proposicion por ta, manera gobierno mes a yega di señala, den forma di ‘hibrier oplossing’ y/of ‘secundaire voorwaarden’ pa e ambtenaarnan, segun Maduro. Es decir cualkier proposicion cu gobierno por sinti mas safe cune. Pero gobierno mester duna cara y laga nan sa kico nan por ofrece.

Cualkier proposicion di gobierno mester ta uno formal y por escrito pa asina e sindicatonan por debati riba dje. E sindicatonan por bin cu e proposicion aki cerca nan base pa discuti riba nan, y wak si nan ta acepta of no. Pero te ainda esaki no a sosode di parti di gobierno.

Mientras cu nan ta haya cu como sindicatonan nan ta mustrando e seriedad di nan banda. Nan a yega di manda carta di recordatorio pa gobierno, ya cu riba e carta cu fecha 26 di juni ultimo cu nan a ricibi di gobierno, no tabatin niun contra proposicion. Mientras cu for di 17 di mei ultimo cu gobierno a pidi e sindicatonan aki tempo y espacio, nan si a tene cuenta cu nan solicitud.

“Nos si a mustra boluntad!,” Maduro a bisa. Nan a yega di haya contesta for di gobierno, pero e sindicatonan ta haya cu nan no tin contenido riba nan proposicion pa loke ta trata indexering. Igualmente nan ta scucha hopi cos cu ta wordo bisa rond, pero ariba papel mes, nan no ta hayando nada concreto.