Operacion di incinerador ta bayendo contra e condicionnan di e hindervergunning, pero a pesar cu habitantenan di area di Parkietenbos a señala esaki na e operador, Caribbean Trucking, autoridadnan y Ministernan, ta manera ningun ta preocupa cu un sentencia di huez.

Esey por lo menos ta e impresion cu e activista mr. Anouk Balentina ta haya. No ta Balentina so a keha di e molester di e huma di incinerador, cu debi na cambio di biento, ta manda huma di e material kima pa e casnan na Bucutiweg y bario di Simeon Antonio.

Na fin di 2020, Huez van der Leur a bisa cu pa Gobierno haya e permiso, esta e hindervergunning, e ta mara na condicion cu entre otro lo mester instala banderanan pa mustra e direccion di biento. Mr. Van der Leur a indica cu pa por opera e incinerador, mester inclui artefactonan pa determina direccion di biento, pa asina por para e mashin di kima ora biento bira. Esaki pa asina evita cu e gas cu ta produci bay direccion di e casnan.

E tempo ey huez a bisa specificamente cu Pais Aruba ta prohibi pa laga e incinerador traha si no tin un bon ‘windvaan’ cu ta claramente visible den area di e ekipo. Y no ta permiti pa laga e incinerador traha si no tin un bandera cora colga pa tur riba Bucutiweg cu tin cu pone pa habitantenan por mira cu berdad ta usando e ekipo. Ademas, a prohibi Gobierno pa permiti cualkier candela na momento cu biento ta supla di direccion contrario, manera ta e caso e ultimo simannan na Aruba. Segun e sentencia di Huez Van der Leur, pa cada dia cu Gobierno no ta cumpli mester paga 5mil florin te na un maximo di mey miyon cu mester bay na Cruz Cora.

Sinembargo, den e dianan aki, habitantenan a haya holo skerpi (den e incinerador ta kima sludge cu ta bin di Bubali Plas, esta desecho humano, ademas di desperdicio medico) y manera a pensa, a haya e incinerador ta funcionando. Y contra e sentencia di Huez, no tabatin e bandera cora poni pa avisa habitantenan cu e incinerador ta den operacion. E asina windvaandel tabata mustra claramente cu e biento tabata bin di zuid, cu ta nifica cu ta hiba e huma riba e barionan.

Un habitante a comenta cu dia di e candela na Daltra, autoridadnan a instrui nan pa evacua. Pero manera Balentina a bisa, hopi a mustra cu departamentonan concerni y hasta e instancia responsabel manera Caribbean Trucking, Minister di Medio Ambiente y Serlimar a keda sin reacciona.

Prome Minister Evelyn Wever Croes den su calidad di Minister di Infrastructura, bao ken e proyecto di incinerador ta cay, durante tratamento di presupuesto di DOW a informa cu e incinerador a keda sin traha pa algun siman, for di 26 di Augustus te cu 7 di September. No pasobra e tabata molestioso pa e habitantenan sino pasobra e material di isolacion, e asina yama ceramic filter di e camber principal a kita y mester a keda reemplasa. E incinerador no por traha sin e material di isolacion.

Pero, tabata habitantenan cu a informa bureau di Prome Minister cu e incinerador tabata operando sin e filter ey. Entre otro Balentina a mustra cu contrario na locual Caribbean Trucking ta bisa, no ta cambia e filternan regularmente. Pa tal motibo mes, el a haya hopi straño cu Minister di Medio Ambiente, Ursell Arends a bisa na Juli 22 cu mester a stop e incinerador di traha pasobra tabata wardando e filternan pa reemplaso yega.

“Na final di dia, nos ta traha cu bienestar di nos hendenan y naturalesa na pecho,” Minister Arends a bisa e dia ey. Pero personanan di e bario ta mustra cu e incinerador ta keda opera, den oranan di anochi en particular, a pesar di e impacto riba e comunidad. A informa e Minister y instancianan concerni di e actividad, cu prueba di potret y video, pero Minister Arends no a actua. Ta te ora cu a manda e informacion pa oficina di Prome Minister a para e incinerador. E Minister ademas mester por sa cu Caribbean Trucking segun e contract mester tin e filternan na man continuamente.

Pero awor pa motibo di tempo, e bario ta continuamente bao huma. Aki ta bolbe den wega e condicionnan di huez pa por a duna e hindervergunning. Esta cu no por tin ningun candela riba e tereno di Parkietenbos ora biento bira. Informacion di Meteo ta mustra cu biento lo ta keda for di direccion zuidoost pa e dianan aki. “Ni den dia, corda anochi, instancianan manera Direccion Naturalesa y Medio Ambiente, DNM ni DOW ni Departamento di Salud ta actua. Esey ta pasobra nan no ta pasa e miseria aki di tur dia,” Balentina a informa Ministernan y a bisa Bon Dia Aruba.

No ta Balentina so a tuma contacto cu Ministernan, pero tur, incluso Minister Arends a keda sin reacciona. “Nos salud ta deteriorando y riba dje, nos tin stress,” Balentina a informa.

Un di e departamentonan cu no ta haci su trabao, segun e activista, ta DNM. E instancia, segun e condicionnan di e hindervergunning mester controla mensualmente e emision di e incinerador cu ta opera segun e hindervergunning cu ta na nomber di Director di DOW, Sr. Marlon Croes. DNM a indica cu bao ningun circunstancia por pone desperdicio radioactivo ni carcas di animal den e planta. Pero, den pasado a mustra cu Caribbean Trucking tabata kima desperdicio medico cu ta inclui resto di material radioactivo.

Pa tal motibo mes, e siman aki, Anouk Balentina a haci un peticion a base di e Ley Openbaarheid van Bestuur, esta e LOB, pa haya tur e rapportnan mensual desde 2020. Balentina a puntra Minister Arends pa presenta e pasonan cu el a tuma den cuadro di tur e peticionnan y suplicanan cu e, como ciudadano afecta, a haci. Den nan, Balentina a urgi e Minister pa implementa ley, y tuma paso ora cu e incinerador tabata opera contra e condicionnan stipula pa huez. “Mi ta haci uso di mi derecho como ciudadano pa haya informacion, sigur ora ta trata di asuntonan di salud y situacion cu ta peliger pa medio ambiente, “ mr. Balentina a bisa, citando tur e articulonan di ley y tratadonan cu ta conta pa Aruba tambe.