Dia Mundial di Curason ta pa conscientisa y enfoca riba un bida mas saludabel

Cada 29 di september ta conmemora Dia Mundial di Curason, pa asina conscientisa mundo henter riba e preocupacion cu ta existi pa cu salud di curason y malesanan cardiovascular, e causanan mas grandi di morto na nivel mundial.

Pa e motibo aki, ayera mainta minister di Salud y Turismo, Dangui Oduber a duna un conferencia di prensa pa para keto un rato den cuadro di conscientisacion pa recorda comunidad con importante ta pa hiba un bida mas saludabel.

Ta p’esey cu henter e siman aki nan a duna un atencion special pa e dia aki, unda cu a pone luz cora na edificio di Besturkantoor, Aruba Airport Authority tambe y WEB Aruba N.V a uni den esaki den cuadro di educacion y conscientisacion cu nan kier duna na comunidad.

Manera ta conoci, pa algun tempo caba Gobierno di Aruba a anuncia e Plan Nacional di Prevencion, cu manera Oduber a sigura, ta den pleno ehecucion. “Un plan cu nos ta duna e atencion necesario na prevencion den salud conhuntamente cu e plataforma di salud y tur stakeholders”, el a bisa.

Pa cu esaki, ultimo fin di siman a organisa e conferencia di Hunto contra Malesanan Cronico, e cual a resulta exitoso caminda tabatin diferente panel organisa di expertonan riba e tereno di prevencion, unda nan a comparti informacion presente tocante kico tur persona por haci pa tene un comunidad mas saludabel, mas participativo den actividadnan fisico y kico ta e maneho cu gobierno mester hiba pa asina percura no solamente pa tin un comunidad mas saludabel, sino pa maneha e gastonan di AZV y sigura cu e fondonan aki ta keda sostenibel.

E mesun fin di siman tambe a tuma luga Expo Salud Contra Malesanan Cronico, e intencion di organisa esaki tabata for di dos aña pasa, pero pa via di pandemia di Covid-19 el a wordo posponi. “Nos ta contento cu nos por a mira e continuacion diasabra ultimo, sigur un expo exitoso no solamente den e cantidad di fundacionnan cu a participa sino tambe pa e cantidad di bishitante”, Oduber a sigura.

Tambe tabatin alternativanan di cuminda mas saludabel pa e bishitantenan y e mandatario a expresa cu e ta kere cu Aruba ta bayendo den bon direccion. “Loke gobierno ta haciendo no ta solamente pa preveni, sino tambe tumando decision- y accionnan concreto pa asina por financia diferente proyecto cu tin di haci cu prevencion”, e mandatario a declara.

Tambe el a informa cu gobierno a lansa algun tempo atras cuatro proyecto specifico unda nan ta bay pone enfasis. Un di nan ta Healthy Life Center cu ta den fase final, cual su tarea principal ta pa yuda tur esnan cu tin problema cu peso of sobrepeso cu ta pasando den momentonan dificil.

“Nos ta bay yuda nan y guia nan cu profesional-, nutricionista- y psicologonan pa yuda nan cambia nan estilo di bida. Esaki ta dirigi riba tur esnan cu ta riba 18 aña”, minister Oduber a enfatisa.

Un otro proyecto cu el a trece dilanti ta Proyecto Jump 18, cu aña pasa a cuminsa un proyecto piloto cu muchanan di cuatro aña y hobennan te cu 18 aña cu tambe tin problema cu sobrepeso. Durante seis luna largo e mucha y hobennan aki a ricibi guia di profesionalnan pa asina cambia nan estilo di bida. Despues di e seis luna aki, ningun di e 18 participante a subi di peso y ora e proyecto a termina nan a haci entrega di certificadonan.

Scol Saludabel tambe ta un otro proyecto cu nan ta bay pone enfasis riba dje, unda cu Unidad di Jeugdgezondheidszorg di Departamento di Salud Publico ta esun cu ta encarga di informa, educa y conscientisa e scolnan pa ta saludabel. E intencion ta pa pone mas fondonan disponibel pa asina por tin mas scolnan primario y secundario participando den e proyecto aki.

Di ultimo, nan ta bay haci diferente campaña di conscientisacion y educacion di kico comunidad hunto por haci pa ta mas saludabel.

Manera minister Oduber a señala, ta conoci cu Aruba no ta e pais cu tin un comunidad mucho saludabel y esey ta causa hopi malesanan cronico. P’esey e prevencion den salud ta importante y pa e motibo ey nan tin confiansa conhuntamente cu Plataforma di Salud, DVG, partners y fundacionnan cu ya caba pa añanan largo ta bin dedicando y haciendo esfuerso pa prevencion den salud. Den proximo añanan ta bay tin un comunidad saludabel, lo baha e mortalidad y baha e presion financiero cu tin na e momentonan aki cu e fondonan di AZV.

Den ultimo añanan pashentnan di sucu y cu ta dialisa a aumenta drasticamente, unda cu edadnan tambe di e cantidad di pashent ta bin bahando y ta p’esey cu ta importante pa tuma accionnan concreto pa haci intervencionnan necesario y enfoca riba prevencion.

E manera con ta bay financia e proyectonan aki ta por medio di un Landsverordening cu e intencion di introduci un impuesto di 15 dollar pa e turistanan cu ta drenta Aruba, pa Aruba por prepara su mes si den caso mester bin un otro pandemia of cualkier otro reto den salud, igualmente cu Corsou y Sint Maarten a haci conhuntamente cu Aruba.