Dos Ministeriële Beschikking publica recientemente pa Gobierno di Aruba ta genera critica tocante contratonan duna directamente, sin pasa door di un proceso di destaho. E casonan ta trata un contrato cu POPA Psychologie- en Onderwijspraktijk Aruba pa sosten riba tereno di hubentud y otro cu TERA NEWS N.V. pa servicio di comunicacion y media.

Den ambos caso gobierno a uza un excepcion den e Aanbestedingsverordening, algo cu a genera pregunta tocante transparencia, gasto publico y escogencia di e contratistanan.

E dos decisionnan ta oficial y a ser publica riba website di Gobierno. Den caso di POPA Psychologie- en Onderwijspraktijk Aruba, Conseho di Minister a aproba e acuerdo dia 14 di juli 2026. E Ministeriële Beschikking, fecha 21 di juli, ta establece cu Bureau di minister encarga cu Relacionnan den Reino, Enseñansa, Hubentud, Innovacion y Deporte tin necesidad di sosten strategico y di contenido riba tereno di hubentud durante duracion di gabinete AVP-FUTURO.

E encargo a ser duna directamente na POPA Psychologie- en Onderwijspraktijk Aruba, representa pa su director R.M.J. Raymond, esta Misha Raymond. Gobierno ta paga un suma calcula na Afl. 13.423 pa luna, incluyendo BBO, B-AZV y B-AVP. Ademas, e acuerdo ta permiti pago di eventual oranan adicional na Afl. 155 pa ora, tambe incluyendo e impuestonan menciona. E gastonan ta sali for di un partida presupuestario di e ministerio.

Den e beschikking no ta establece un fecha specifico pa final di e contrato. En bes di esey, e ta establece cu e acuerdo ta cuminsa 1 di augustus 2026 y ta dura mientras cu Gabinete AVP-FUTURO ta den gobierno. Esaki ta nifica cu e costo total finalmente lo depende di cuanto tempo e gabinete keda den funcion y di si tin uzo di ora adicional.

Gobierno mes ta reconoce den e documento cu, mirando e costo involucra, en principio mester a tuma lugar un destaho priva. Sinembargo, gobierno a dicidi pa no aplica e procedemento aki. E motibo presenta ta cu e sosten ta rekeri conocemento specifico y cu, pa motibo di e caracter particular di e trabao, minister mester por tin confiansa cu colaboracion cu e experto concerni lo sigui bon. Segun e beschikking, Raymond ta cumpli cu e exigencianan aki.

Ta juist e excepcion aki, combina cu e perfil politico anterior di Raymond, a bira parti di e discusion publico. Raymond tabata parlamentario y lider di fraccion di RAIZ durante e periodo gubernamental anterior. E contrato a ricibi critica fuerte y algun medio local, politico y residente a cuestiona si e relacionnan politico anterior por a hunga algun papel den e decision. Tambe a surgi pregunta tocante si e servicio no por a ser cumpli door di personal publico existente of si otro profesionalnan mester a haya oportunidad pa competi pa e encargo.

E argumento oficial di gobierno pa no tene un destaho priva y otorga e contrato directamente ta basa riba necesidad di conocemento specifico y confiansa entre minister y e experto. P’esey, tin critica fuerte tocante posible faboritismo.

Un di dos contrato publica na final di augustus ta pone mas atencion riba e tema di contratacion directo. Den Ministeriële Beschikking no. 531/26, fecha 26 di augustus, minister encarga cu Turismo, Transporte y Labor a aproba un contrato directamente cu TERA NEWS N.V. – cu ta produci medionan manera Enfoke, 24ora y Trempan – pa servicio specialisa di comunicacion y media. Conseho di Minister a aproba e decision dia 14 di augustus.

Den e caso aki gobierno ta indica cu e ministerio tin necesidad di sosten den comunicacion strategico, relacion publico, relacion cu media, informacion pa publico y otro actividadnan di comunicacion. Segun e beschikking, TERA NEWS tin conocemento, experiencia, capacidad y infrastructura pa ehecuta e encargo, ademas di alcance via diferente canal di comunicacion. Gobierno ta menciona specificamente radio, television, medio digital y plataforma di social media, y capacidad pa produci contenido desde for di comienso te publicacion.

E contrato a cuminsa 1 di september 2026 y ta sigui te 1 di september 2027 na un costo di Afl. 5.000 pa luna, incluyendo BBO, B-AZV y B-AVP. Calcula riba 12 luna, esaki ta representa aproximadamente Afl. 60.000 di gasto publico. E fondo ta sali for di presupuesto pa promocion y informacion di Ministerio di Turismo, Transporte y Labor.

Den e caso aki tambe gobierno ta reconoce explicitamente cu, mirando cu e costo ta mas cu Afl. 25.000 pero menos cu Afl. 200.000, en principio un destaho priva mester a tuma lugar. No obstante, e minister a considera cu e servicio ta specifico, cu e capacidad actualmente no ta disponibel den aparato publico y cu confiansa entre cliente y contratista ta esencial. Riba base di esaki, gobierno a aplica articulo 16 di Aanbestedingsverordening y a duna e contrato directamente na TERA NEWS.

E dos decisionnan hunto ta pone un pregunta mas amplio dilanti comunidad: te unda gobierno mester uza e posibilidad legal pa haci excepcion riba procedemento normal di contratacion publico, particularmente ora e beneficiario ta un persona of entidad cu tin un perfil publico of conexionnan conoci den comunidad.

E hecho cu gobierno a opta pa duna e contratonan directamente no ta nifica automaticamente cu esaki ta contra ley. E Aanbestedingsverordening ta permiti pa desvia for di e procedemento regular bao di cierto circunstancia. Den ambos caso, gobierno ta basa su decision riba articulo 16, prome inciso, apartado b. E discusion ta concentra mas riba e motibo pa haci uzo di e excepcion aki, necesidad di e gastonan y si asignacion directo tabata e opcion mas adecuado.

Den caso di e contrato di POPA, e suma mensual ta un punto central den e critica. Afl. 13.423 pa luna ta representa mas cu Afl. 161.000 riba base anual, sin inclui oranan adicional. Door cu e contrato ta liga na duracion di gabinete y no na un periodo fiho di un aña, e suma final por varia considerablemente. Residente, oposicion y algun medio local a cuestiona e suma di e salario y e decision di asigna e contrato directamente, sin duna otro profesionalnan oportunidad pa presenta nan oferta.

E contexto politico ta haci e discusion mas sensibel. Raymond no ta solamente un profesional den psicologia di mucha y hoben, pero tambe un ex-parlamentario di RAIZ. Anteriormente su posicion politico a cambia den un momento importante den relacionnan entre gobierno y oposicion. E antecedente aki ta ser menciona den critica publico awor cu su practica a haya un contrato directo di gobierno. Sinembargo, ningun di e documentonan oficial consulta ta establece un relacion entre su actuacion politico anterior y asignacion di e contrato actual.

E contrato cu TERA NEWS ta genera otro tipo di pregunta, considerando cu gobierno a contrata directamente un compania di media y comunicacion pa brinda servicio na un ministerio. Segun e beschikking, e alcance di e compania y su capacidad pa comunica den diferente idioma ta entre e motibonan pa su escogencia. Sinembargo, no ta menciona si otro proveedor a ser evalua of por a ofrece e mesun tipo di servicio, ni si tabatin diferencia den costo. E documento tampoco ta presenta un comparacion di prijs cu otro opcionnan disponibel.

E preocupacion tocante transparencia ta cay den un momento cu oposicion ya ta eherce presion riba gobierno pa mas rendicion di cuenta. Parlamentarionan a critica minister Gerlien Croes recientemente pa falta di transparencia y a insisti cu un minister mester duna Parlamento y pueblo claridad tocante decision y gastonan relaciona cu funcion publico.

E peticion pa mas transparencia ta relevante tambe den contexto di e dos contratonan aki, pasobra aunke e beschikkingnan ta duna e base legal, suma y motibo general pa e asignacion directo, nan no ta inclui tur e detaye tocante con e servicio y e costo a ser determina. Esaki ta laga varios aspecto cu no por ser evalua solamente riba base di e informacion cu gobierno a publica.

Aunke e beschikkingnan ta duna claridad tocante e base legal y aprobacion di e dos acuerdo, ainda tin informacion cu no ta aparece den e documentonan publica. Den caso di POPA, por ehempel, no ta detaya cuanto ora di trabao e pago mensual ta cubri, cuanto ora adicional Gobierno ta anticipa ni con e tarifa a ser determina. Pa TERA NEWS, no tin un desglose di e Afl. 5.000 mensual pa e diferente servicionan, ni un comparacion cu prijs di mercado. Loke si ta cla ta cu Conseho di Minister a aproba ambos acuerdo y cu gobierno a opta pa haci uzo di e excepcion legal pa no sigui e procedemento di destaho cu en principio tabata aplicabel.

Mientras critica ta sigui, ainda tin pregunta tocante necesidad y costo di e dos servicio, e manera cu e proveedornan a ser scogi y pakico gobierno a opta pa asigna e contratonan directamente. E discusion ta sigui concentra riba transparencia y uzo di fondo publico.