Corsou a legalisa e reduccion di salario di tur empleadonan di compania y entidadnan di Gobierno y a stipula e compensacion maximo cu un director por ricibi.

Den un ley presenta na Parlamento, Gobierno di Corsou a determina reglanan pa entidadnan publico y e argumento di e ley ta cu e ta pa yega na salario y compensacion cu ta deseabel y socialmente responsabel, particularmente pa cumpli cu condicion di Hulanda pa por a ricibi sosten di likides. Ademas, e ley ta trata e pakete total di condicional laboral di tur trahado di e sector (semi) publico cu mester keda reduci cu 12.5 porciento.

Ademas e ley ta establece legalmente e normanan y maximalisa e condicion laboral pa funcionarionan halto den entidadnan publico.

E ley ta defini e entidad publico como un persona huridico cu ta ricibi subsidio of cu ta carga pa mas di 50 porciento door di Gobierno, sea pa subsidio directo of indirecto. Tambe ta trata di companianan cu Gobierno tin accionnan den pa mas di 50 porciento, y finalmente fundacionnan cu ta cay bao di e ley di ‘corporate governance.’

Salario maximo pa funcionarionan halto

Un compania publico no por paga mas di 260 mil florin bruto pa aña na su top ehecutivo. E suma aki ta encera su salario, vakantie uitkering, bonus, toeslag y cualkier otro compensacion, hasta den natura. E ta a base anual y mester ta riba presupuesto di e entidad

.

Pa loke ta uso di auto di compania pa fin personal, esaki ta unicamente reserva pa Director. Pues ningun otro trahado por haci uso di auto di compania den oranan priva. E auto no por ta mas caro cu 75 mil florin of un pago di lease di 2250,00 pa luna. Lo inclui e calculacion di pago di belasting incluso e primanan den e compensacion total pa e Director. Lo no permiti ningun suma adicional, y lo no tin compensacion pa e pago di belasting y prima cu e facilidad di auto di compania pa uso priva lo trece cune.

Biahe pa trabao

E ley tambe ta regla e maximo na gasto pa biahe pa trabao. E gasto di hotel ta keda maximalisa na 300 dollar of 300 euro. E biahenan mester sosode den clase economico, alomenos cu e biahe ta dura mas di 3 ora. Den un caso asina por bula den e clase ‘business.’

E compensacion pa dia lo ta 100 dollar si ta trata di biahenan entre e paisnan Hulandes den Caribe, y 150 euro of 150 dollar ,si ta trata di biahe respectivamente pa paisnan den Union Europeo y resto di mundo. E suma maximo di compensacion lo baha na mita si e biahe ta menos di 12 ora.

Reduccion temporal di salario

Locual e ley, cu a keda presenta dia 17 di Februari ultimo na Parlamento di Corsou ta regla tambe ta e reduccion temporal di salarionan di trahadonan di entidadnan publico. A base di ley ta corta e condicion di trabao pa tur trahado cu 12.5 porciento pa un aña. Cualkier derecho di aumento di salario ta keda posponi pa 2021.

A areglo no ta conta pa esnan cu ta gana sueldo minimo.

Aruba

Aruba tambe mester cumpli cu e mesun condicionnan cu Hulanda a exigi pa haya sosten di likides. Como tal, por deduci cu Gobierno di Aruba tambe lo mester bin cu un areglo legal pa yega na e asina yama Wever Croes norm pa ehecutivonan den entidadnan publico y tambe e reduccion temporal di condicionnan laboral di trahadonan den e companianan aki. E intento di e companianan pa baha e condicionnan di trabao a haya resistencia di sindicatonan y awor ta pendiente decision di hues den e caso cu SIWA a entama. E ta keda na Gobierno pa fiha su posicion a base di ley, pa asina cumpli cu e exigencia di Hulanda.