Si insisti pa sigui mantene cu ta corta 5 miyon den cuido, e ta bay afecta henter cuido medico na comunidad y lo mester forsa Parlamento dicidi ken ta haya cuido y ken no. Esey CEO di IMSAN, dr. Joel Rajnherc a bisa Bon Dia Aruba.

Dr. Rajnherc tabata den sesion ayera cu Comision Fiho di Salud di Parlamento, hunto cu un cantidad di representante di sector di cuido, for di HAVA, Boticarionan, te na dr. Horacio Oduber Hospital pa ilustra e problema cu e cortamento di 5 miyon florin pa luna ta crea pa henter e sector. “Y nos no ta papia di e cortamento di 5 porciento den salario, cu tambe ta un aspecto, pero nos ta papia di e calidad di cuido en general.”

Manera ta conoci, tur e actornan den cuido a manda un carta pa Minister di Turismo, Salud y Deporte Dangui Oduber y pa Gobernador pa expresa e presion enorme cu e decision pa baha e presupuesto pa cuido cu 5 miyon. Particularmente pasobra a impone e suma sin cu tabatin un proceso di planificacion con ta e miho forma pa corta esaki. “Nos ta compronde cu Gobierno mester a tuma un decision mesora, y bay de acuerdo cu e condicion aki, esta pa corta 5 miyon florin for di cuido di un momento pa otro. Pero, nos ta den un pandemia y net awor tin mas urgencia pa cuido.”

No tin rosea pa traha un plan sostenibel

Door cu a corta sin consulta , ta dificil pa permiti e hala rosea pa pensa riba un sistema cu realmente ta sostenibel. Si corta 5 miyon pa luna sin mas, no por duna bon cuido mas. E ta irealistico, e Director di IMSAN a bisa.

“Claro, tur organisacion den cuido, sea laboratorio, dentista, fisioterapista tur mester haya oportunidad pa sinta hunto pa mira con pa hisa eficiencia den cuido medico. Por ehempel, con ta organisa e colaboracion entre un specialista mester ayudo di un otro dunado di cuido sin cu e mester costa AZV mas placa, cua innovacion por haci na Aruba cu por evita cu mester manda pacient pa exterior. Pa percura cu e placa cu nos ta gastando, keda Aruba por lo menos.”

Esey ta locual ta urgi Gobierno y Parlamento di Aruba esta pa bolbe negocia cu Hulanda pa kita e exigencia di corta 5 miyon florin pa luna pa seis luna y asina permiti esnan den e sector pa bin cu un plan sostenibel pa e siguiente 10 a 15 aña. Den otro palabra pospone e reduccion pa 5 miyon pa 6 luna pa asina por haya rosea y traha riba e plannan.

COVID-19

E paso aki ta crucial, particularmente pasobra e pandemia ta poniendo hopi presion riba e gasto medico. E ta hopi costoso. “Un pacient cu COVID-19, despues di sali di cuido intensivo, despues di sali di hospital ainda ta rekeri hopi atencion medico. E no ta cla cu atencion medico. Su famia tampoco cu ta keda cu tur ansiedad y angustia. Tur ta pone cu e consumo medico ta hopi grandi. No ta cuestion di duna cuido pa COVID pa un dia, sino cu nos mester spera e efectonan pa dos tres aña.”

Den otro palabra, e costo pa tratamento di COVID-19 ta exponencial. No ta djis e cuido na hospital y di specialistanan cu riba su mes ta caro caba. Esnan cu a sali di cuido intensivo mester siña tecnica di hala rosea atrobe for di fisioterapistanan, otro tin problema neurologico cu mester haya ayudo pa recupera nan balansa. Otro ta keda cu problema muscular. Tin otro cu mester di psikiatra pasobra a keda cu miedo pa sali di cas. “Ta problemanan cu mundialmente ta mescos. No ta na Aruba so. Na Hulanda tambe tine. Pero Hulanda no ta tene cuenta cu na Aruba nos tambe ta confronta e asuntonan aki.”

Gobierno a bay de acuerdo cu e cortamento di gasto na juni 2020, a base di e recomendacion di CAft na Gobierno Hulandes. CAft a usa un investigacion cu PWC a haci algun aña pasa y a conclui a base di e analisis ey, cu por spaar 5 miyon florin pa luna. “Pero pa e sector di cuido, e conseho di PWC no ta hopi cla, pasobra ta papia di 5 miyon y no ta bisa si e mester ta un biaha 5 miyon of cada luna. CAft a interpreta e conclusion di e rapport cu ta por cu un reduccion di 5 miyon cada luna.”

Rajnherc ta compronde cu ora “bo ta haya cuchiu riba garganta cu bo pais no tin ningun entrada, Gobierno berdad no a haya e oportunidad pa sinta cu sector medico pa determina si por logra si of no. AZV a hinca e plan di cinco paso pa corta gasto mas lihe posibel, cu a produci problemanan tambe. Por ehempel, cu mester a stop e transporte di pacient cu diabetes pa haya dialyse. Despues mester a re-introducie atrobe, te cu a finalisa cu a retira e Director di AZV. Tur ta señal cu ora ta tuma decision pisa asina bou stress, bou presion, no ta haya e oportunidad pa pensa bon kico ta tur e consecuencianan. Y esey ta bay resulta den mal cuido den futuro.”

IMSAN

Dr. Rajnherc ta contento cu IMSAN por a maneha e prome seis lunanan sin cu a confronta e cortamento. Riba dje, e tabata un bendicion pa Aruba cu na April a inicia e tratamento di radio terapia na Aruba mes . Nos no tabata completamente cla pa cuminza trata mas hende. Pero ma pone hopi enfasis pa nos ta cla, pasobra nos a ripara cu a cera frontera cu Colombia tambe. Entretanto, entre April 1 y awor, IMSAN a duna radioterapia na 125 pacient cu cancer, personanan cu a caba cu e tratamento. Y awor, tur dia tin 24 persona cu ta haya radiotherapie. “E ta hopi. Si multiplica e cantidad cu ta ricibi radioterapia awor aki, ta nifica cuanto hende lo mester a manda Colombia si IMSAN no tabata brinda e servicio aki. E ta un cantidad cu ta hopi mas cu nos a spera. Siman pasa a haya e prome pacient di Saba cu a bin pa su tratamento.

Pero tambe a logra haci 100 operacion di retina. Si IMSAN no a pusha pa amplia su facilidad y personal pa e intervencion aki, lo a nifica cu tur e personanan aki lo mester a bay Colombia pa e operacion. Antes tur e pacientnan ey tabata bay Colombia. Awor tur e placa ta keda Aruba.

Locual a yuda IMSAN ta cu prome cu e pandemia realmente a cuminza afecta e finanzas di e institucion, ya tur e organisacion y infrastructura tabata cla pa tratamentonan aki. “Nos tabatin suerte cu aña pasa tur e aparatonan tabata nobo nobo, y den e prome aña tur e productonan aki ta cay bou garantia y no tin problema cu mantencion. Pero e aña aki, 2021, e garantia a caduca. Nos lo haya e klapnan e aña aki. E aña aki nos lo mester paga pa mantencion preventivo, si no kier haya problema cu e ekipo despues. Pasobra si e mashin kibra lo mester haci mas gasto ainda. Pues, tur e cortamento aki ta influenciando e cuido cu nos por duna, si nos mester paga otro cos.

Un proveedor lo no acepta pa keda warda pa su placa, pasobra e tambe mester di su placa. “Si ta algo pa seis luna, nos lo por wanta cabes riba awa. Pero si ta pa mas largo, e ta bay dal nos duro.”

Servicio esencial

E mensahe pa Hulanda y ciudadano ta cu e cortamento den servicio medico tin consecuencia di bida y morto. E ta bay yega na un momento cu mester dicidi ki tipo di cuido por duna y ken lo por haya esaki. Un ehempel ta e servicio di Dr. Casper Lacle y Dr. Robert Dennert kendenan a cuminza cu cardiologia di intervencion na hospital dos aña pasa, y mas di 2000 hende a pasa den e proceso. “Ta cuanto hende a scapa di un atake di curazon. Pero kico nos lo bay haci awor? Bisa un hende cu e no por haya e intervencion aki mas, pasobra e ta avanza di edad y no tin placa p’e? Ken ta bay tuma e decision ey?”

Un decision asina aki no ta keda den man di e dokter so. Mester ta realistico y ta consciente cu esaki ta un decision politico, cu ta keda den man di comunidad. “Y ken ta representa e pueblo? No ta Parlamento?”

Den concepto di Rajnherc ta yega momento cu Parlamento lo determina normanan ki ora un persona lo por haya tratamento di radioterapia of di curazon y ta decisionnan duro. “Parlamento, na nomber di pueblo mester tuma e decision.”

Parlamento mes a pidi pa e reunion despues di a ricibi e carta cu dunadonan di cuido a manda pa nan y Gobierno. “Nos tur por a splica e efecto riba cada un di nos areanan, pero tambe riba henter e cadena di cuido,” Dr. Rajnherc a bisa.

Bon Dia Aruba lo amplia riba e combersacion cu Dr. Rajnherc den su proximo edicion, unda entre otro ta toca e tema di e gasto medico na Aruba compara cu na e otro paisnan den Reino Hulandes.