(AP) — Facebook ta suheto na retonan di privacidad di Union Europeo for di vigilantenan di cualkier estado miembro di e bloc, no solamente su regulador lider na Irlanda, segun e corte supremo di e bloc a dicidi ayera, den un veredicto cu tin implicacionnan pa otro companianan tecnologico grandi.
Bao e reglanan di privacidad stringente di Union Europeo, conoci como e Regulacion General di Proteccion di Data (GDPR pa su siglanan na Ingles), solamente e autoridad nacional di proteccion di data di un pais tin e poder pa maneha casonan legal involucrando kehonan di data a traves di fronteranan, den un sistema conoci como ‘one-stop shop’. Pa Facebook, cu tin su sede Europeo na Dublin, ta e Comision di Proteccion di Data di Irlanda. Sinembargo, Corte di Husticia di UE a duna veredicto cu ‘bao cierto condicionnan’, un vigilante nacional tin poder pa hiba un compania corte pa un violacion di GDPR hasta si no ta e regulador lider.
E veredicto ta den linea cu un opinion preliminar di un consehero di corte y, segun expertonan, potencialmente ta habri caminda pa un ola nobo di casonan di privacidad den e 27 nacion miembro di UE.
E decision di e corte ta trece un fin na un bataya legal largo entre Facebook y e autoridad di proteccion di data di Belgica tocante hurisdiccion pa e caso, cu tabata centra riba e uso di cookies di e red social pa track comportamento di usuarionan di internet, hasta esnan cu no tin un cuenta.
E compania a argumenta cu e vigilante Belga no tabatin hurisdiccion mas despues cu GDPR a drenta na vigor na 2018.
Facebook a pint’e como un victoria, notando cu bao e veredicto e regulador Irlandes lo keda como lider excepto den circunstancianan limita. “Nos ta complaci cu CJEU [Corte di Husticia di UE] a sostene e balor y principionan di e mecanismo one-stop shop, y a resalta su importancia pa sigura aplicacion eficiente y consistente di GDPR na Union Europeo”, segun Jack Gilbert, consehero general asocia di e compania, a bisa.
Vigilante di privacidad di Irlanda a ricibi critica pa tuma demasiado largo pa resolve un cantidad creciente di casonan GDPR involucrando gigantenan tecnologico incluyendo Apple, Twitter, Google y Instagram, pero e vigilante ta argumenta cu e casonan ta complica.
