(AP) – Un analisis nobo di muestra di sanger di mas o menos 24,000 Mericano cu a ser tuma aña pasa ta e investigacion mas reciente y mas grandi cual ta sugeri cu e coronavirus a drenta U.S den december 2019, algun siman prome cu e caso nan a cuminsa ser detecta pa oficialnan di salud.

E analisis no ta definitivo y algun experto te ainda tin duda tocante e resultadonan pero e oficialnan di salud federal ta aceptando cada bes mas e concepto cu posiblemente tabatin un cantidad chikito di infeccionnan di COVID-19 den U.S prome cu e mundo a bira consiente di e peligro cu e virus nobo aki originando for di China lo trece pa henter e mundo.

“E estudionan ta basta consistente” Natalie Thornburg di Centers for Disease Control and Prevention (CDC) ta declara.

“Probablemente tabatin caso nan hopi leve y poco comun den nos pais hopi antes di ora nos a bin haya sa di su existencia y presencia den nos comunidad y no a plama te cu fin di februari.” Thornburg a agrega, ken ta investigado principal di CDC su ekipo di virus respiratorio immunologico.

“E resultadonan aki ta resalta e necesidad pa e trabao den ekipo di tur e paisnan mundialmente. E ta necesario pa tur e paisnan aki traha hunto pa asina por identifica virusnan nobo cu ta formando recientemente lo mas lihe cu ta posibel.” Thornburg ta agrega.

E pandemia di coronavirus a cuminsa den Wuhan, China den final di aña 2019. Oficialmente e prome caso di infeccion den U.S a ser identifica den un meneer di Washington, U.S cu a caba di bin bek di un biahe na Wuhan riba 15 di januari, y a bay busca ayudo na un clinica dia 19 di januari.

Oficialnan di CDC inicialmente a bisa cu e chispa cu a cuminsa e brote den U.S a yega den un periodo di mas o menos 3 siman entre mita di januari y comienso di februari. Sinembargo, investigacionnan desde e tempo aki, incluyengo algun di nan haci pa CDC mes, ta constata cu tin un cantidad chikito di infeccion nan cu a tuma luga prome cu esaki.

Un estudio haci pa CDC den december 2020 cu a analisa casi 7,000 muestra di donacion di sanger di American Red Cross (Cruz Cora) tambe ta sugeri cu e virus a infecta algun Mericanonan den comienso pa mita di december den aña 2019.

Manera e estudio haci pa CDC, e investigadonan aki ta busca e anticurpanan den e sanger cu ta tuma como evidencia di e presencia di un infeccion di coronavirus, y por ser detecta mas o menos 2 siman despues cu un persona a ser infecta.

E investigadonan aki ta bisa cu 7 di e persona cu a participa, 3 di Illinois y 1 cada un di Massachusetts, Mississippi, Pennsylvania y Wisconsin, a ser infecta prome cu cualkier caso di COVID-19 a ser reporta originalmente den e estadonan aki.

Un di e participantenan aki, cual ta di Illinois a ser infecta durante pasco, Keri Althoff ta declara, ken ta profesor na Johns Hopkins Bloomberg School of Public Health y e estudio su autor principal.

E por ta dificil pa distingui anticurpanan cu ta neutralisa SARS-Cov-2, cual ta e virus cu ta causa COVID-19, cu e anticurpanan cu ta combati otro coronavirusnan incluyendo algun cu ta causa un griep normal y comun. Investigadonan di ambos NIH y CDC ta usa diferente tipo di test y experimento pa minimalisa resultadonan positivo eroneo of falso, mas algun experto ta bisa cu aunke ta tuma e precaucionnan necesario, toch e ta keda un posibilidad cu e resultadonan positivo di 2019 ta infeccionnan cu ta otro tipo di coronavirus, no esun di e pandemia.

“Mientras cu e ta completamente posibel cu e virus a ser introduci den U.S hopi mas trempan di lo ke nos ta pensa of kier kere, e no kiermen cu esaki ta evidencia necesariamente fuerte pa cambia e manera cu nos ta pensa y actua pa cu e coronavirus.” William Hanage, un experto di Harvard University den dynamica di enfermedadnan ta declara.

E investigadonan di NIH no a duna siguimento na e participantenan di e estudionan conduci pa wak si algun a biaha fuera di U.S prome cu nan infeccion. Pero si a haya un dato notabel cu e 7 participantenan no tabata residente di of rond di e area di New York City of Seattle, unda cu e prome ola y brote di casonan di COVID-19 den U.S tabata concentra.

“E pregunta ta, con y unda e virus a gara forsa.” Alhoff ta bisa. E estudio nobo ta indica cu “probablemente el a gara forsa den hopi diferente parti den e pais.” Althoff ta agrega.

LEAVE A REPLY

Please enter your comment!
Please enter your name here