Home Local Corte: dokter cas a faya den caso di pashent cu cancer

Corte: dokter cas a faya den caso di pashent cu cancer

6384

Medisch Tucht College Aruba, e organo legal di disciplina den casonan medico, a duna un dokter di cas na Aruba un medida di ‘reprimande’ (advertencia) den un caso unda e pashent masculino ta sufriendo di cancer di tripa. 

Segun un relato manda pa Corte Comun e dokter (nan no a publica su nomber) a tarda mucho pa referi e pashent na un specialista.

E no a haci e testnan necesario y asina no a actua manera mester den casonan similar. Tampoco e dokter a tuma un ‘anamnese’ cual ta haci preguntanan specifico pa determina entre otro malesanan den famia di un pashent. Esaki tabata importante como cu den e caso aki e pashent ta core un riesgo mas halto pa haya cancer di tripa como su mama a fayece a consecuencia di e mesun malesa na edad di 70.

E dokter tambe a keda sin test e sanger corecto y asina a duna un diagnostico robes. El a  prescribi remedi innecesario y manera bisa, a tarda mucho pa manda e pashent un specialista pa control.

E pashent a entrega un keho cu pa motibo di fayo di e dokter di cas e no a ricibi tratamento na tempo y adecua. E Colegio ta comparti esaki pero ta bisa cu no por determina lo a duna un otro resultado den e caso e pashent si a ricibi e tratamento corecto. mas trempan.

Medisch Tucht College Aruba si ta conclui cu a tarda 3 luna pa e pashent ricibi e tratamento corecto pa motibo di e fayo di e dokter di cas. Pa motibo di esey nan a duna e dokter di cas un advertencia.