Un tribunal internacional a haya cu gobierno di Jamaica a viola e derechonan di homber gay y un lesbiana, segun un veredicto revela diaranson, y activistanan ta bisa cu esaki por pone un precedente den un region pa largo conoci pa e acoso legal di comunidad LGBT.

Comision Interamericano di Derechonan Humano a duna e veredicto na september 2019, pero e comision a tene esaki confidencial te ayera. “Esaki awo ta e caso historico di derechonan humano LGBT pa henter region Caribe”, segun Human Dignity Trust, un organisacion legal basa na Reino Uni cu a presenta e caso na e comision na 2011.

E trust a representa Gareth Henry, kende abogadonan ta bisa ta un homber gay bibando como un refugiado na Canada; y Simone Edwards, un lesbiana cu nan a bisa a haya su mes forsa pa bandona Jamaica.

Henry a busca asilo na Canada na 2008 despues di enfrenta brutalidad di polis y varios atake na man di gruponan homofobico, incluyendo un multitud di alrededor di 200 persona cu a core su tras gritando cu mester asesina hendenan gay, segun e trust.

Edwards a wordo tira varios biaha pafo di su cas na 2008, pa hende cu a purba di mata e y su dos ruman homber, un di ken tambe ta gay, segun abogadonan a bisa, agregando cu el a perde un di su riñonnan y parti di su higra. El a ricibi asilo na Europa.

Activistanan a elogia e decision di e comision, cual ta un cuerpo autonomo di Organisacion di Estadonan Americano. A pidi pa gobierno di Jamaica duna reparacion completo, incluyendo compensacion economico, pero no tin respuesta te awo, segun Tea Braun, director di Human Dignity Trust, a bisa AP.

El a bisa cu Jamaica ainda no a cumpli cu ningun di e otro recomendacionnan di e comision. “Nos ta urgi pa gobierno Jamaiquino reconoce e sufrimento personal di Gareth y Simone y acelera e repelacion di e leynan discriminatorio aki.”

Jamaica ta un di nuebe pais den Caribe cu ainda tin ley prohibiendo intimidad consensual homosexual, segun e trust. Esaki ta inclui Barbados, Dominica, Grenada, St. Lucia, St. Vincent and the Grenadines, St. Kitts and Nevis, y Antigua and Barbuda. E leynan di era colonial ta pidi castigo cu ta varia entre 10 aña te bida largo den prison, cu un incluyendo labor forsa tambe.

Mientras tin tiki cumplimento di e leynan, organisacionnan di derechonan humano ta nota cu violencia y acoso ainda ta existi den Caribe, y miembronan di comunidad LGBT ta frecuentemente rechasa na momento di aplica pa vivienda of empleo.

Potret: Human Dignity Trust.

LEAVE A REPLY

Please enter your comment!
Please enter your name here