Corte di Prome Instancia di Aruba a pospone e procedura sumario inicia pa Aruba Birdlife Conservation (ABC) contra Gobierno di Aruba y Fundacion Parke Nacional Aruba (FPNA) te dia 12 di november proximo. A tuma e decision a pesar di obhecion di ABC, cu a argumenta cu mas negociacion cu gobierno no lo sirbi ningun proposito.

Mientras tanto, un carta entrega pa abogado di ABC ta revela cu tres departamento di gobierno recientemente a recomenda pa bolbe na e rutanan alternativo proponi na 2022.

Hues A.H.M. van de Leur a duna su decision dia 14 di october, un dia prome cu e audiencia tabata programa pa tuma lugar. E audiencia nobo ta poni pa diahuebs 12 di november, 2:30pm.

Gobierno a solicita pa bolbe pospone e caso pa permiti mas discusion entre e partidonan. ABC a opone e solicitud aki, argumentando cu reunionnan anterior no a produci solucionnan concreto, y cu e uso continuo di areanan ambientalmente sensitivo ta rekeri intervencion hudiciario urgente.

Sinembargo, e hues a considera e interesnan di tur partido involucra, incluyendo esnan buscando di participa den e procedura, como tambe e interes publico mas amplio na Aruba. Corte a conclui cu otro posponemento tabata hustifica.

Pero hues a indica tambe cu, en principio, no ta bay permiti mas posponemento.

Hues ta spera negociacion conhunto

Un elemento importante di e decision ta trata e participacion di operadornan di tour den futuro discusionnan.
Corte a declara explicitamente cu ABC y un representante di operadornan di tour ta spera di participa hunto den negociacionnan constructivo cu gobierno ora cu gobierno invita nan pa haci esaki.

Esaki ta significante pasobra anteriormente ABC a expresa obhecion pa negocia directamente cu operadornan di tour.

Den un carta fecha 14 di october, abogado G.W. Rep a splica cu ABC ta compronde cu e instruccion anterior di corte ta rekeri discusion cu gobierno, no necesariamente cu sector turismo.

Segun Rep, presidente di ABC, Greg Peterson y su famia a ricibi menasa personal despues di declaracionnan publico y discusion riba rednan social tocante e disputa. E abogado a argumenta cu spera di Peterson cu e lo participa boluntariamente den discusionnan cu individuonan asocia cu e ambiente hostil aki no ta rasonable.

Sinembargo, corte awo a laga cu ta spera di gobierno, ABC y un representante di operadornan di tour pa participa hunto den discusion constructivo.

ABC ya a presenta un compromiso

Den su carta pa corte, Rep ta disputa e sugerencia cu ABC no ta dispuesto pa coopera of propone solucion. Segun e abogado, ABC a entrega un propuesta concreto na minister Rene Herde dia 11 di september, dividiendo e area afecta den costa nort den cuatro seccion.

ABC a propone pa cera permanentemente e area entre Tera Cora y e prome rancho cerca di Aruba Shack Beach pa trafico motorisa, incluyendo e area natural maneha pa Aruba Conservation Foundation (ACF).

E organisacion tambe a propone cera permanentemente e area mas leu di Natural Bridge, incluyendo Andicuri.

Sinembargo, ABC a sugeri pa e seccion entre Bushiribana y Natural Bridge keda habri.

Pa e area entre Alto Vista y Bushiribana, ABC a propone un areglo temporal cu ta permiti acceso limita pa UTV bao condicion estricto, sigui pa un reduccion gradual den trafico di vehiculo.

E condicionnan aki lo inclui monitoreo cu GPS, velocidad maximo, restriccion riba tamaño di grupo y cantidad diario di vehiculo, areanan designa como prohibi, medida di zonido y stof, medida di aplicacion, y castigo.

Segun Rep, e propuesta aki tabata destina pa duna un base pa negociacion mientras ta atende e daño ambiental causa pa vehiculo off-road.

E abogado a bisa cu gobierno no a responde cu un alternativa suficientemente concreto.

Desacuerdo tocante reunionnan anterior

Rep ta describi varios reunion entre ABC y minister Herde durante september y october. Segun e carta, ABC a ricibi un e-mail di gobierno dia 23 di september, casi dos siman despues di entrega su propuesta.

Durante un reunion dia 24 di september, e minister a pidi ABC pa retira su solicitud pa adelanta e proceduranan di corte.

ABC a responde puntrando si gobierno lo restaura e piedranan grandi usa anteriormente pa blokea acceso na Tera Cora y Alto Vista mientras negociacion ta continua. Segun e abogado, e minister no por a duna un contesta afirmativo.

Otro reunion a tuma lugar dia 5 di october. Rep ta bisa cu e minister a bolbe yega sin un propuesta concreto, y a indica cu e tabata wardando un documento for di ACF.

Eventualmente a manda e documento pa ABC riba e anochi di 9 di october.

ABC a considera e propuesta insuficiente pasobra, segun Rep, a trata solamente Tera Cora y no a duna un solucion comprensivo pa e otro areanan involucra den proceduranan di corte.

E abogadonan tambe a critica un propuesta involucrando uso di DirtGlue pa construi of stabilisa un caminda den un area ambientalmente sensitivo.

Rep ademas a cuestiona e preparacion di e documento, incluyendo si a usa inteligencia artificial. Sinembargo, e carta no ta duna evidencia confiable estableciendo con hopi of si tabatin cualkier uso di AI.

E critica aki ta representa posicion di ABC. E decision di corte pa pospone no ta determina si e propuesta di gobierno tabata adecuado.

Departamentonan di gobierno a recomenda bay back na propuesta di 2022

Un di e desaroyonan mas significante den carta di Rep ta trata documentonan cu ABC a obtene dia 13 di october.

Segun e abogado, un recomendacion conhunto fecha 24 di september ultimo a keda entrega na minister Herde pa directornan di Departamento di Obra Publico (DOW), Departamento di Infrastructura y Planificacion (DIP) y Departamento di Naturalesa y Medio Ambiente (DNM).

E recomendacion ta referi na investigacion haci na 2022 tocante e efectonan ambiental di trafico di ATV y UTV den areanan designa pa proteccion di naturalesa y paisahe.

E investigacion aki a resulta den un documento fecha 13 di october 2022, conteniendo recomendacion pa regula ruta di vehiculo off-road.
Segun e carta di e abogado, e investigacion tabata basa riba investigacion na e sitio, experticio tecnico, cooperacion interdepartamental y input di sector turismo.

E documento a identifica tres area unda no mester permiti trafico off-road: Faro-Alto Vista, Natural Bridge-Indjek/Blackstone Beach, y e caminda di santo entre Seroe Colorado y Anker Cora.

E tambe a propone tres ruta off-road alternativo.

Esakinan ta inclui un ruta nort cerca di Alto Vista bayendo Bushiribana, un ruta central entre Bushiribana y Natural Bridge, y un ruta sur den direccion di Baby Beach.

Segun informacion, e recomendacion ta conseha gobierno pa resumi e proceso for di e punto unda el a stop anteriormente.

E directornan ta enfatisa cu e rutanan proponi anteriormente, y e proteccion sostenible di Tera Cora mester t e punto di salida pa un solucion legalmente sostenible.

Segun e paragraf reproduci den carta di Rep, separa di e principionan aki lo rekeri un decision administrativo hustifica explicitamente basa riba hecho nobo, cambio den circunstancia of hallazgo nobo, mientras ta respeta tur procedura legal aplicable.

E departamentonan tambe, segun informacion, a indica cu un solucion basa riba investigacion existente, politica estableci, y decisionnan anterior, probablemente lo ta den miho posicion pa resisti scrutinio hudicial.

ABC ta cuestiona maneho di minister

Rep ta argumenta cu e recomendacionnan departamental ta particularmente importante pasobra nan ta demostra cu posible solucionnan ya a keda investiga varios aña atras.

E abogado ta bisa cu no a informa ABC anteriormente di e recomendacionnan aki, y nan no a ricibi nan mediante solicitud pa informacion di gobierno.

Segun Rep, e areanan restringi proponi ta coresponde na un grado considerable cu e restriccionnan cu ABC a sugeri independientemente na september.

E abogado ta acusa minister Herde di busca propuesta cu ta desvia di e conseho di su propio departamentonan, particularmente tocante acceso entre Tera Cora y Alto Vista.

Sinembargo, e recomendacion departamental completo di 24 di september, y e estudio original di 2022, no tabata inclui den e carta di cinco pagina. Ta referi na e documentonan como evidencia entrega na corte.

Hues tampoco a haci un veredicto substancial tocante si e minister a actua contrario na e conseho departamental of si e areglonan proponi pa gobierno ta cumpli cu legislacion ambiental.

Procedura ta continua otro luna

Abogado di ABC a conclui e carta di 14 di october solicitando pa corte rechasa e aplicacion di gobierno pa bolbe pospone.
Rep a argumenta cu discusionnan anterior a faya di produci progreso significante y cu mas negociacion probablemente no ta bay resolve e disputa.

E hues, sinembargo, a dicidi cu e interesnan involucra ta hustifica duna e partidonan tempo adicional.

E decision ta pone enfasis renoba riba negociacionnan involucrando gobierno, ABC y un representante di operadornan di tour.

E preguntanan substantivo tocante acceso na areanan natural protegi, ruta off-road alternativo, y e responsabilidadnan ambiental di gobierno, ta keda sin resolve.

A menos cu circunstancianan hustifica mas cambio, e caso awo ta programa pa continua dia 12 di november, ora corte ta spera di scucha argumentonan di e partidonan.