(AFP)—E dak di un scol a cay abou den ciudad di Peshawar, den noordwest di Pakistan, diahuebs, matando 32 studiante, mayoria di nan bou di 14 aña, y un maestra. Autoridadnan ta atribui e accidente na infrastructura den mal estado.
Un otro 20 studiante a ser hiba hospital, mientras cu residentenan y personal di rescate tabata haci tur esfuerso pa saca muchanan bou di e restonan. Otro residentenan di e bario densamente pobla a conta con nan a scapa di e tragedia.
Un homber cu a duna su prome nomber so, Sohail, a conta AFP cu “tur hende a cuminsa grita den panico” ora su sobrina, cu a logra scapa for di e edificio, a yega cas pa conta nan cu e scol a cay abou.
“Ora mi a yega na e sitio, mi a mira alrededor di 10 te 15 mucha pega bou di e restonan, cu e materialnan kibra acumula te na nan garganta. Nos a saca nan afo rapidamente,” el a declara.
Asim Khan, di hospital Lady Reading na Peshawar, a declara cu e cifra di morto a subi te 33 pa anochi diahuebs, cu mayoria di e victimanan entre cuater y 14 aña, ademas di un maestra.
Mayoria di e muchanan cu a ser hiba hospital ya a haya permiso pa bay cas. Tres mucha cu a sufri lesionnan na cabes a keda interna, segun Khan.
Un vocero di e servicio di rescate di emergencia den provincia di Khyber Pakhtunkhwa a declara cu e muchanan di scol a keda aplasta y pega bou di e restonan despues cu e dak a cay abou.
“Ora e ekiponan di emergencia di Rescue 1122 a yega na e sitio, nan a descubri cu un dak a cay riba un otro, causando cu e klas bou di dje a keda aplasta y muchanan a keda pega paden,” vocero Bilal Ahmad Faizi a declara.
Un alto funcionario na Peshawar a conta AFP cu reportahenan inicial ta indica cu e dak a cay debi na “infrastructura debil”.
Curpanan sin bida, lora den paña blanco, a ser carga for di hospital, mientras cu boluntarionan a yega pa yuda identifica e victimanan.
Edificionan cu ta cay abou ta algo frecuente na Pakistan, principalmente debi na normanan di seguridad deficiente y materialnan di construccion di calidad inferior den e pais di Asia di Sur, cu tin mas di 240 miyon habitante.
Na juni, mas di un dozijn di mucha a muri ora un dak a cay abou na un centro di bijles den ciudad di Lahore, den oost di e pais.
Na 2025, 27 persona a muri y 10 a keda herida ora un edificio di cinco piso a cay abou den e bario pober di Lyari, den ciudad di Karachi, den zuid di Pakistan.
