Corte di Prome Instancia a rechasa e peticionnan di Friendly Green Bike Company Aruba VBA y Evikes Corporation VBA pa suspende e ‘last onder dwangsom’ (orden administrativo bao di pena di multa) cu Gobierno a impone nan pa motibo di huur di e-steps, bicicleta electrico y scooter electrico sin e permiso rekeri.

E caso ta gira principalmente rond di pregunta si e vehiculonan electrico cu e empresanan ta huur na publico ta cay bao di Landsverordening personenvervoer. Green Bike y Evikes a sostene cu e ley aki no ta aplicabel na nan e-steps y e-bikes y, consecuentemente, cu nan no mester di e permiso di huur menciona den articulo 3, tercer inciso, di e ordenansa.

Corte no a acepta e argumento ey. Segun Gerecht, e-steps y e-bikes ta vehiculo di dos wiel sin carroceria cera y nan ta move pa medio di un motor electrico. Pa e motibo ey, nan ta cay bao di e definicion di verhuurmotorfiets den Landsverordening personenvervoer. Como e empresanan ta huur e vehiculonan sin chauffeur, Corte ta conclui cu nan mester dispone di e permiso corespondiente. Sin e permiso, segun Corte, tin un infraccion contra e ordenansa.

E conflicto a intensifica despues cu minister a anuncia na april cu uso di e-steps riba caminda publico no ta permiti. Na mei, Green Bike y Evikes a presenta peticion pa un permiso, pero primordialmente nan a pidi un positieve weigering, esta un decision cu ta confirma nan posicion cu un permiso no ta necesario. Gobierno, di su banda, a mantene cu e permiso si ta obligatorio.

Na 29 di juni, minister a impone un last onder dwangsom. Entre otro, e empresanan mester stop di ofrece y huur e vehiculonan pa uso riba of for di caminda publico, desactiva posibilidad di huur nan via QR-code, app, website of otro medio digital, y no mantene nan disponibel riba of canto di caminda publico of otro sitio accesibel pa publico cu intencion di huur nan.

E consecuencia financiero por ta considerable. Segun e decision impugna, despues di e termino concedi, por incuri un dwangsom di Afl. 500 pa cada vehiculo separa, pa cada dia calendario of parti di un dia cu e infraccion continua.

Green Bike y Evikes a argumenta cu aplicacion inmediato di e medida lo causa daño financiero serio y por pone continuidad di nan empresa na peliger. Corte a reconoce cu nan posicion financiero ta bao presion y a considera cu nan tin suficiente interes urgente pa Corte trata e peticion. Sin embargo, esey no tabata suficiente pa suspende e medida.

Otro punto importante ta legalisacion. E empresanan a indica cu nan tin peticion di permiso pendiente. Pero Corte a determina cu actualmente no tin bista concreto riba legalisacion. Un factor importante ta cu den nan propio peticion nan a pidi primordialmente pa Gobierno rechasa e permiso, precisamente pasobra nan ta sostene cu e permiso no ta necesario. Ademas, anteriormente Gobierno ya a indica cu no tin perspectiva di legalisacion di e-steps electrico.

Corte a reconoce cu e medida por tin consecuencia financiero drastico pa ambos empresa. Sin embargo, segun Corte, e interes comercial no ta pisa mas cu e interes general relaciona cu cumplimento di e obligacion di permiso y seguridad di trafico. Consecuentemente, no tin base pa suspende e last onder dwangsom.

Resultado practico di e sentencia ta cu Green Bike y Evikes no por sigui cu huur di nan e-steps y e-bikes den e forma actual sin e permiso rekeri. Tampoco nan por mantene e vehiculonan riba of canto di caminda publico disponibel pa huur mientras e situacion continua.

Corte a rechasa ambos peticion. E sentencia tambe ta indica expresamente cu contra e decision aki, cu ta trata e peticion pa provision provisional bao di articulo 54 di Lar, no tin hoger beroep.