Corte di Prome Instancia di Aruba a duna veredicto na fabor di Ibersol Holding & Management VBA den su reto contra e rechaso di gobierno pa otorga un natuurontheffing – un excepcion di proteccion di naturalesa – cu ta necesario pa construccion di un hotel na Hudishibana.

Corte a haya cu e decisionnan a ser tuma pa un minister cu no tabata legalmente competente pa hacie, y cu varios consideracion ambiental usa pa gobierno a bay mas leu cu loke por protege bao Ordenansa di Proteccion di Naturalesa.

E veredicto no ta nifica cu Ibersol a ricibi e ontheffing of cu por cuminsa construccion inmediatamente. Sino cu e minister competente mester reconsidera e caso y duna un decision nobo dentro di tres luna.

Hotel na Hudishibana

Segun e veredicto di dia 30 di september ultimo, Ibersol tin intencion pa construi un hotel riba un tereno na Hudishibana, pa cual tin un acuerdo di erfpacht cu Pais Aruba. E compania ya a obtene un permiso di construccion y un aanlegvergunning (permiso pa obra of desaroyo di tereno).

Sinembargo, tin flora y fauna protegi presente den e area. Pa e motibo aki, Ibersol tambe ta rekeri un ontheffing bao di Natuurbeschermingsverordening (Ordenansa di Proteccion di Naturalesa, Nbv) prome cu construccion por cuminsa. Ibersol a solicita e ontheffing na september 2024. E solicitud a keda rechasa na februari 2026, y despues di esaki, e compania a reta e decisionnan den corte.

E minister robes

Corte prome a considera si e minister cu a rechasa e ontheffing tabata autorisa legalmente pa haci esaki.

Despues di cambio na ministerionan di Aruba, e legislacion di presupuesto 2026 a altera e structura di varios ministerio. Sinembargo, e landsbesluit formalmente asignando responsabilidad na e ministerionan nobo ainda no tabata adopta.

Corte a conclui cu responsabilidad pa proteccion di naturalesa a keda cu e minister cu tabatin autoridad bao di e structura ministerial anterior – kiermen, e division di ministerio den gobierno anterior.

E decisionnan rechasando e ontheffing di Ibersol no tabata firma pa e minister ey. Pa e motibo ey, corte a haya cu e decisionnan a ser tuma sin autoridad adecuado, y mester keda anula.

Sinembargo, pa motibo cu por coregi e problema aki ora di tuma un decision nobo, corte tambe a examina e substancia di e rechaso di gobierno.

Presencia di especie protegi

Departamento di Naturalesa y Medio Ambiente (DNM) a identifica 15 especie di flora y 12 especie di fauna dentro di e area protegi. Ocho especie ta designa como protegi.

DNM tambe a identifica palo y cadushi ecologicamente valioso, como tambe rooi cu ta considera importante pa maneho di awa y un zona di conexion ecologico.

Ademas, DNM a punta riba cada bes mas presion riba ecosistemanan di Aruba for di turismo y crecemento di hotel. A considera e proyecto di acomodacion di gran escala como inconsistente cu provisionnan di ROPv, e Plan di Desaroyo Teritorial.

Basa riba e impacto ambiental y presencia di especie protegi, gobierno a duna mas peso na e interes di naturalesa y interes general, cu na interes di Ibersol den desaroya e hotel.
Pero e corte a haya cu gobierno a aplica e Ordenansa di Proteccion di Naturalesa demasiado ampliamente.

Ley di Naturalesa ta protege planta y animal individual

Segun corte, Nbv no ta protege balor natural en general. E ta protege specificiamente mata y animal cu ta pertenece na especienan formalmente designa como protegi.

Esaki ta nifica cu e minister no por rechasa un ontheffing bao di e ordenansa particular aki, basa solamente riba preocupacionnan amplio manera e consecuencia ecologico di turismo, interes arkeologico, maneho di awa of e funcion di e area como un zona di conexion ecologico.

E consideracionnan aki por ta ambientalmente importante, pero nan no ta, riba nan mes, interesnan protegi bao di Nbv.

Nan por bira relevante si e daño lo resulta den un violacion involucrando mata of animal protegi individualmente. Segun corte, sinembargo, e minister no a investiga e conexion aki suficientemente.

Corte a haci un distincion similar tocante ROPv.
E proteccion ambiental conteni den ROPv ta mas amplio cu esnan den Ordenansa di Proteccion di Naturalesa. Problemanan manera erosion, interupcion di sistemanan di awa, y daño na balornan ecologico y panoramico ta pertenece den e evaluacion di un permiso di construccion of e aanlegvergunning.

Den e caso aki, e permisonan ey ya a keda otorga na Ibersol. Corte a declara cu, pa e motibo ey, cumplimento cu ROPv mester ser asumi na momento di evalua e ontheffing.

Gobierno mester haci mas investigacion

Asina mes, e veredicto no ta rekeri gobierno pa duna Ibersol e ontgeffing; sino cu e minister competente mester haci mas investigacion prome cu tuma un decision nobo.

Corte a haya cu inventario di DNM di flora y fauna ta insuficiente. Gobierno mester establece con construccion di e hotel por afecta mata y animal protegi cu ta presente den e area, y determina si esakinan ta importante pa mantene nan respectivo especie.
E ora e minister mester evalua e interes publico den protege e mata y animalnan aki, contra e interesnan di Ibersol.

Gobierno tambe mester investiga si por otorga un ontheffing suheto na condicionnan cu ta reduci e impacto riba especienan protegi.

Un posibilidad identifica specificamente pa e corte ta pa reloca e mata of animalnan.

Ibersol a entrega un “Environmental Management Plan for development of H3,” splicando con por reloca flora y fauna protegi. Corte a haya cu e minister incorectamente no a tene consideracion cu e plan aki. Awo, e plan mester forma parti di e evaluacion nobo.

Conseho cientifico tambe ta rekeri

Otro problema ta trata e conseho cientifico rekeri pa Ordenansa di Proteccion di Naturalesa.

Na e audiencia, gobierno a declara cu un institucion na Corsou a keda designa como e autoridad cientifico, pero no tabata capaz di duna suficiente conseho pa motibonan tecnico.

Corte a haya e splicacion aki insuficiente. Na momento di reconsidera e aplicacion, e minister mester solicita conseho di e autoridad cientifico designa.

E audiencia tambe a revela cu gobierno tin un maneho cu ta trata ontheffing bao di e Nbv, pero cu e maneho aki ainda no a keda publica. Corte a bisa cu si un maneho asina ta existi, e minister mester of aplic’e, of splica pakico no ta us’e den e caso aki.

Decision nobo den tres luna

Corte a declara e apelacionnan principal di Ibersol bon funda y a anula e decisionnan cu Ibersol tabata retando.

A duna ordo na e minister competente pa tuma un decision nobo tocante obhecionnan di Ibersol dentro di tres luna despues cu a manda e veredicto na e partidonan.

Gobierno tambe mester paga Afl. 1.400 pa gastonan legal di Ibersol, y duna back e suma di Afl. 25 cu a paga na corte den cada un di e dos caso relevante. Dos apelacion adicional entrega pa Ibersol a keda declara inadmisible a base procedural.

E veredicto no ta determina si na final Ibersol ta bay ricibi permiso bao Ordenansa di Proteccion di Naturalesa. E ta rekeri gobierno pa reconsidera e ontheffing bao di e autoridad legal corecto, y pa enfoca su evaluacion specificamente riba e mata y animal protegi cu ta cubri bao di e ley, incluyendo si nan proteccion por keda sigura bao condicionnan mara na un ontheffing.