E debate tocante spearfishing na Aruba a bolbe haya atencion despues cu e pagina di Facebook di Piscadonan di Aruba a cuestiona e prohibicion riba uzo y importacion di harpun, speargun y otro herment pa piscamento bao di awa. E grupo ta boga pa regulacion y permiso en bes di un prohibicion amplio.

Desde 2020 gobierno a introduci un maneho temporal pa spearfishing bao di cierto condicion y despues a anuncia un sistema permanente di permiso. Sinembargo, e Landsbesluit di 2001 cu ta prohibi hermentnan pa pisca bao di awa ainda ta vigente.

Den varios publicacion reciente, Piscadonan di Aruba ta enfoca principalmente riba loke e grupo ta considera un contradiccion entre e discurso tocante sostenibilidad, seguridad alimentario y produccion local, y e restriccionnan cu piscadonan ta enfrenta. Segun e pagina, autoridadnan ta confisca herment y pesca di piscadonan y, den cierto caso, ta impone boet.

E grupo ta cuestiona pakico spearfishing ainda mester ser trata principalmente via prohibicion, en bes di un sistema moderno di regulacion. Piscadonan di Aruba ta sostene cu spearfishing por ta un forma selectivo di pesca, pasobra e piscado por mira y scoge e pisca prome cu captura esaki. Ademas, segun e pagina, hopi hende cu practica spearfishing ta drenta lama for di costa y ta captura un cantidad limita di pisca pa consumo propio of benta di e resto.

Segun e argumento presenta, e metodo tampoco ta laga liña di pesca, red of trampa den lama y, den caso di piscadonan cu drenta for di costa, no ta rekeri consumo di combustible pa un boto. E grupo ta uza e puntonan aki pa sostene cu prohibicion general no necesariamente ta e manera mas efectivo pa atende preocupacionnan ambiental.

Un punto cu ta haya atencion particular ta uzo di polespear pa mata lionfish. Piscadonan di Aruba ta argumenta cu e herment aki por ser uza pa combati e especie invasivo y p’esey ta cuestiona e restriccionnan riba importacion y posesion di e herment aki. Segun e pagina, hasta piscadonan cu anteriormente a solicita y haya un permiso bao di e maneho temporal ta enfrenta dificultad pa importa piesa y otro material relaciona.

E discusion tin un base legal cu ta bay atras varios decada. E Natuurbeschermingsverordening di 1995 ta forma parti di e marco legal pa proteccion di flora y fauna na Aruba. Bao di e ordenansa aki, na 2001 a introduci e Landsbesluit verboden onderwaterjachtmiddelen. E decreto ta prohibi importacion, posesion y uzo di arma cu rasonablemente por ser considera manera destina exclusivamente pa mata bestia cu ta biba den awa.

E meta original di e prohibicion tabata proteccion di biodiversidad y ambiente marino. E validez di e regulacion a yega te dilanti Hoge Raad na Hulanda. Den e proceso legal a ser señala cu spearfishing comercial tabata un di e preocupacionnan y cu legislador Arubano deliberadamente a opta pa un prohibicion amplio di hermentnan manera harpun y speargun pa proteha ambiente marino.

E prohibicion, sinembargo, a ser cuestiona y evalua varios biaha. Ya den añanan despues di su introduccion tabatin intento pa cambia e situacion. Un proyecto pa retira e Landsbesluit a ser prepara, pero Raad van Advies a duna un conseho negativo na 2009. Entre e aspectonan considera tabatin proteccion di ambiente marino y obligacionnan internacional di Aruba. E decreto finalmente a keda na vigor.

Na 2020 a bin un cambio importante den e debate. Durante pandemia, gobierno a considera flexibilisa e prohibicion, entre otro den contexto di dificultad economico y posibilidad pa habitantenan captura cuminda pa nan propio consumo. E intencion a causa preocupacion entre organisacionnan ambiental. E tempo ey cu Rainbow Warriors Aruba a expresa preocupacion cu eliminacion di e prohibicion por tin consecuencia pa ambiente marino.

Mas despues den 2020, gobierno a publica un gedoogbeleid, esta un maneho bao cual spearfishing por ser tolera bao di condicionnan specifico, mientras cu e prohibicion formal den ley a keda na vigor. E decision tabata relaciona cu mocionnan aproba den Parlamento y a ser presenta manera un solucion transitorio pendiente di un sistema legal permanente.

E maneho tabata destina pa residente di por lo menos 18 aña cu suficiente conocemento pa uza e hermentnan responsablemente y cu un permiso temporal personal. Esaki ta un diferencia importante den e debate actual: spearfishing no a ser legalisa completamente. E prohibicion original a keda existi, mientras cu gobierno a crea posibilidad pa tolera e actividad bao di condicionnan determina.

Na 2021, Warda nos Costa a intensifica control riba spearfishing y a indica cu piscadonan mester cumpli cu e condicionnan stipula pa evita sancion. Asina, e prohibicion legal a keda vigente, cu e maneho introduci na 2020 como excepcion bao di cierto condicion.

Na 2022 gobierno a anuncia su intencion pa reemplasa e situacion temporal cu un maneho mas permanente. E tempo ey Ministerio di Naturalesa tabata preparando un sistema di permiso y cu e permisonan temporal existente lo ser prolonga mientras e proceso tabata andando. E posicion presenta e tempo ey tabata cu spearfishing por ta un forma sostenibel di pesca, pero cu e actividad mester ta debidamente regula y controla.

Entre e metanan menciona tabata evita daño na coral, combati sobrepesca, proteha especienan vulnerabel, combati especie invasivo, facilita control y colecta informacion tocante pesca.

Na 2023 e proposicion a bira mas concreto. Ministerio di Naturalesa a presenta un modelo den cual spearfishing lo ta permiti solamente cu permiso di minister. Santa Rosa lo encarga cu registracion y maneho di permiso, mientras cu importacion y benta di speargun, polespear y piesanan relaciona lo ser controla basa riba e sistema di permiso.

E proposicion tabata inclui un curso obligatorio, areanan unda e actividad por tuma luga, registracion di captura y un lista di especie cu por ser captura. E intencion tabata pa pasa di un prohibicion general cu excepcion temporal pa un sistema den cual gobierno por determina ken por practica spearfishing, unda y bao di cua condicion.

Un aspecto particularmente relevante den contexto di e critica actual ta cu gobierno mes a contempla un excepcion pa especie invasivo manera lionfish. Segun e maneho presenta na 2023, lo permiti herment cu ta funciona cu elastico, mientras cu esunnan neumatico, esunnan cu ta funciona cu aire comprimi , lo keda prohibi. Pa captura especie invasivo manera lionfish, lo permiti uso di polespear, cu no tin trekker.

Esaki ta duna contexto na e critica actual di Piscadonan di Aruba. Si polespear of piesanan di reemplaso ta ser confisca of nan importacion ta ser nenga actualmente, manera e pagina ta indica, esaki por ilustra e tension entre e Landsbesluit existente y e sistema nobo cu gobierno anteriormente tabata preparando.

E proceso tampoco aparentemente a yega na un solucion definitivo despues di 2023. Na november di 2025, Minister di Sector Primario Geoffrey Wever a reuni cu miembronan di e comision cu anteriormente tabata den dialogo cu Santa Rosa tocante legislacion di spearfishing. Informacion publica tocante e reunion a indica cu formulacion di e ley ainda tabata bao consideracion y cu minister a pidi tempo pa studia e asunto.

Piscadonan di Aruba ta pone e debate tambe den contexto di seguridad alimentario y tradicion local. E pagina ta sostene cu pesca ta parti di cultura di Aruba y cu restriccion riba especie, herment y acceso na diferente area ta limita posibilidad di piscadonan local pa produci cuminda. E grupo ta menciona proteccion of restriccion relaciona cu, entre otro, calco, gutu, grouper, tribon, raya y kreft, como tambe acceso na cierto area natural y Marine Park.

Sinembargo, e diferente restriccionnan no necesariamente tin e mesun base legal ni e mesun motibo. Proteccion di especie, regulacion di area natural y prohibicion di cierto herment ta forma parti di un marco mas amplio di conservacion. E pregunta central ta unda mester hala e liña entre acceso na recurso marino y necesidad pa evita sobrepesca y daño na ecosistema.

E dimension ambiental tampoco por ser laga afo di e debate. Ecosistema marino di Aruba ta enfrenta diferente tipo di presion y proteccion di rif, coral y poblacion di pisca ta un parti importante di maneho di naturalesa. Alabes, lionfish ta un especie invasivo cu organisacionnan ambiental mes ta combati. Tin iniciativanan pa captura lionfish, precisamente pa limita impacto di e especie riba ecosistema local.

E publicacionnan reciente di Piscadonan di Aruba ta trece e tema di spearfishing, cu ta pendiente pa varios aña, un biaha mas pa dilanti. Despues di mas cu dos decada di prohibicion formal, un gedoogbeleid desde 2020 y diferente anuncio pa introduci un sistema permanente di permiso, e debate ainda no ta completamente resolvi.

E diferencia principal entre e posicionnan no ta necesariamente relaciona cu necesidad pa proteha naturalesa. E punto central ta si un prohibicion amplio ainda ta e instrument mas apropia, of si Aruba por pasa pa un modelo cu permiso, zonificacion, lista di especie, control, educacion y coleccion di dato. Esaki tabata e direccion anuncia door di gobierno anteriormente. Mientras cu e proceso legal no ta cla, e publicacionnan di Piscadonan di Aruba ta mustra cu, pa parti di comunidad di piscado, e falta di un solucion definitivo ta sigui causa frustracion.