(AP) – Toru Kubota, un reportero Hapones ken a ser aresta mientras cu e tabata cubriendo un protesta den Myanmar y deteni pa mas di 3 luna, a bisa cu su experiencia a haci su persona mas determina pa conta e storia di personanan na e pais.

“Mi ta sinti cu mi por compronde nan sentimento mas,” el a bisa na un conferencia di prensa na tokyo dialuna.

Kubota, ken tin 26 aña di edad, a keda aresta dia 30 di juli y laga den libertad dia 17 di november den un amnistia anuncia pa Myanmar su gobierno militar. El a ser sentencia na 10 aña di prizon pa supuestamente kibra leynan di inmigracion, sedicion y otro violacionnan. Academico Australiano Sean turnell, ex embahador Britanico Vicky Bowman y Americano Kyaw Htay Oo tambe a ser laga den libertad durante e amnistia aki. Sinembargo Kubota a enfatisa cu hopi persona a permanece encarcela.

“Mi ta solamente un di e 16,000 personanan aki,” Kubota a bisa, refiriendo na e cantidad di persona cu a ser deteni, segun e Assistance Association for Political Prisoners, un organisacion cu ta monitor derechonan.

Kubota a bisa cu e ta entre 20 persona cu a ser poni den loke el a describi como un “celda infernal” cu ta asina chikito cu nan mester a drumi riba di otro. Despues el a keda transferi na prizon Insein na Yangon, e ciudad mas grandi na Myanmar, tambe conoci como Burma. E prizon ta cas di prizoneronan politico bao varios gobierno anterior.

Kubota a mustra copianan di mensahenan cu prizoneronan a duna su persona pidiendo pa ayudo. “Nos ta spera cu tur hende por yuda trece husticia, derechonan humano y democracia cu ta necesario na Burma,” un di e mensahenan a bisa. “Danki pa para cu e personanan di Burma,” otro a skirbi.

El a indica tambe cu e tin speransa di sigui traha peliculanan cu lo trece atencion na e peticionnan di e personanan na Myanmar. Su peliculanan anterior ta inclui varios tocante Myanmar, incluyendo un documental tocante e minoria cu ta persigui cual ta e refugiadonan Rohingya cu a huy for di e pais. “Ser nenga bo libertad ta nifica cu bo no por lanta bo bos, bo no por expresa bo opinionnan. E ta kita bo derechonan for di bo, e ta completamente kita bo libertad,” el a bisa.

LEAVE A REPLY

Please enter your comment!
Please enter your name here