Den cuadro di Dia di San Juan y celebracion di Dera Gay 2020 diaranson ultimo, director di departamento di Cultura Aruba (DCA), Siegfried Dumfries a expresa su satisfaccion y gradicimento na tur esnan cu a yuda pa haci posibel cu e fiesta tradicional aki por a tuma luga. A pesar di e crisis cu pais Aruba y henter mundo ta pasando aden debi na e pandemia di Covid.

Dumfries a declara na Bon Dia Aruba cu situacion di Covid-19 a haci cu e diferente rekisitonan a wordo poni dor di DVG, entre nan distanciamento social, labamento di man y evita aglomeracion den un luga of espacio chikito. Tur esaki a haci cu nan mester bin cu un alternativa otro. Nan mester a pensa di un manera mas innovativo pa sigui cu e celebracion di e fiesta aki hancra den nos cultura.

Añanan anterior nan tabata promove pa mantene bibo e tradicion cultural aki abordo di un bus hunto cu minister di Cultura, Xiomara Maduro, den cual nan tabata bishita e diferente centro di bario. Pero mirando cu dor di e Covid-19 y tur e restriccion cu a bin acerca, nan a dicidi di no haci esey, pero si bin cu algo nobo.

Den esey director di DCA a duna tur credito na nan colega John Freddy Montoya cu a bin cu e idea di pone e representacion di Dera Gay den un forma semi-teatral di ‘tableau vivant’. Tabatin dos presentacion un entre 8’or y 9’or di mainta y otro entre 5’or y 6’or atardi cu a conta cu full un elenco, tanto bailado y diferente participante pa ilustra e fiesta aki.

Dumfries a bisa cu como departamento, nan a sostene Montoya pa no laga e fecha special di San Juan y Dera Gay pasa sin mas. P’esey DCA a sostene e idea innovativo y bunita aki. Nan a realisa e celebracion aki riba caminda publico memey di caminda bayendo aeropuerto y dilanti di Departamento di Aeronautica Civil. Pero principalmente teniendo na cuenta cu tur e rekisitonan di DVG. El a tuma luga den aire liber cu ta identifica cu e celebracion di San Juan /Dera Gay 2020 a sosode manera historia ta cont’e.

Normalmente DCA ta bishita tur scol primario y tambe e aña aki nan a bolbe hacie. Nan a bay cu e documentacion cu ministerio di Cultura a prepara pa medio di un buki cu ta contene historia di San Juan y Dera Gay. El a splica cu e aña aki tabatin algo extra caminda a wordo traha un material audio visual distribui via un USB-stick pa tur muchanan di kleuterschool entre 4 pa 6 aña di edad.

 

 

LEAVE A REPLY

Please enter your comment!
Please enter your name here