Aruba y Corsou ta den e mesun categoria cu Cameroon y Cambodia den e lucha contra traficacion di hende. Esaki segun e TIP 2020 reporte. Departamento di Estado Mericano pa e ultimo 20 añanan ta produci e analisis di traficacion di hende rond mundo y ta compila su conclusionnan den su TIP report. TIP ta Trafficking in Persons, y pa hopi tempo Aruba, tabata den e nivel Tier 2. Hulanda por ehempel ta den Tier 1. Pero pa 2020, Aruba cay den un categoria mas abou, cu ta e Watch List.

Segun e analisis di Departamento di Estado Mericano, entrada di migrante y refugiadonan Venezolano ta sigui impacta esfuersonan di Aruba pa combati traficacion di hende. Ta net e grupo aki tabata particularmente vulnerabel pa e crimen contra traficacion y autoridadnan Arubiano no a identifica ningun victima ni a investiga crimennan di traficacion contra nan. Mas ainda, autoridadnan na Aruba a bruha traficacion den hende cu contrabanda, den e forma aki stroba efectividad den persecucion, prevencion y proteccion di victimanan di trafico di persona.

Esaki ta e motibo pakico Departamento di Estado Mericano a baha Aruba for di Tier 2, pa Tier 2 Watch List.

Definicion

Traficacion di hende ta defini na varios forma y ta un negoshi ilicito lucrativo, unda e ganashinan ta sobrepasa traficacion di droga. Traficacion severo di hende ta sclavitud moderno, unda ta recluta, sconde, transporta, provee y obtene un persona pa haci trabounan, pa medio di fraude y/of forsamento. Di e forma aki e persona ta bira suheto na obligacion, sea pa motibo di debe of sclavitud, pa ofrece servicio sexual, particularmente si e persona ta menor di edad. E victima den e caso aki no mester tabata transporta di un pais pa otro.

Por ehempel, traficadonan na Brasil, bou capa di mandatonan religioso ta explota victimanan den labor forsa, sea den industria of restaurant, despues cu e ultimonan aki drenta cierto Misa of secta religioso. Na Cambodia, traficadornan ta uza hende muhe of mucha muhe, pa motibo di pobresa, pa haci trabou sexual den sector turistico. Na Inglatera, ta forsa muchanan pa bira mula den e traficacion di droga, y na Merca, muchanan den e sistema di cuido di estado ta cay den man di traficadornan di hende pa haci trabou sexual.

Aruba ta den Tier 2 Watch List y esaki ta nifica cu nos tin un administracion publico cu no ta cumpli cu e standardnan minimo di Departamento di Estado, aunke cu ta haci esfuerso grandi pa cumpli cu standardnan. Esaki ta nifica si cu e cantidad di victima ta significante, of ta aumentando na nivel alarmante, y e pais, den e caso aki, Aruba, no ta tuma accionnan concreto y proporcionalmente. Ademas tin un falta den duna prueba cu berdad tin aumento den esfuerso pa combati diferente forma di traficacion di hende compara cu e aña prome. Por ehempel, mas investigacion, persecucion legal y sentencianan di crimennan di traficacion, ademas di asistencia incrementa na victima y caida den indicacion cu personanan den Gobierno ta complice den traficacion di hende.

Specificamente, Aruba a sigui cu su campaña di conscientisacion. Pero, Gobierno di Aruba no a mustra un aumento den esfuerso compara cu añanan anterior. A investiga menos caso, a pesar di e cantidad di migracion (illegal) for di Venezuela, particularmente.

Ta urgi Aruba pa cambia leynan existente pa hisa e castigonan existente pa crimennan di traficacion sexual, incluso abuso. Tambe pa identifica victimanan den e gruponan vulnerabel, manera esnan cu ta den prostitucion, trabou domestico of ta traha den construccion, supermercado y tiendanan. Tambe ta urgi pa Aruba duna informacion na tur trahado migrante y turista riba nan derecho y recurso pa asistencia, incluso Venezolanonan. Y lo mester formaliza acuerdo cu organisacionnan no-gubernamental, manera Rode Kruis y sector priva pa percura cu tin centronan di estadia adecuado pa victimanan adulto y esnan di menor di edad

Casonan den Corte

Segun Departamento di Estado di Merca den su TIP, gobierno a baha su esfuersonan pa persigui e crimen di traficacion di hende. A criminalidad traficacion sexual y laboral pa un victima di 16 aña bay ariba y un castigo di 12 aña, si e victima ta menor di edad. Sinembargo realidad ta cu hopi abuso y traficacion sexual ta dirigi riba victimanan riba 16 aña. Aruba a bisa cu e cantidad di contrabanda for di Venezuela a pone hopi presion riba e sistema hudicial di e isla, cu a dificulta e proceso pa investiga e relacion cu traficacion di hende. Di otro banda, na 2019 a investiga un (1) solo caso, compara cu tres na (3) 2018 y siete (7) na 2017. No tabatin ningun sentencia na 2019.

Tampoco Gobierno a investiga, persigui of sentencia empleadonan publico cu estadisticanan ta mustra cu mester ta complice den ofensanan di traficacion di hende.

“Gobierno a baha esfuerso di proteccion. E ekiponan multidisciplinario cu ta consisti di personal polis, departamento di labor y inmigracion a sigui opera. Pero, asina mes, Gobierno no a raporta ni identifica ningun victima na 2019. Autoridadnan a raporta cu hopi Venezolano a dicidi di keda Aruba y traha ilegalmente y informacion di comunidad a ilustra cu a mira aumento den peticion pa asistencia di parti di victimanan.

Mecanismo

No tur cos ta negativo. Berdad ta cu Aruba a institui un mecanismo formal unda por referi victimanan di traficacion pa asina guia esnan encarga pa combati e crimen aki. Di otro banda, no a raporta ningun caso di victima cu a haci uzo di e mecanismo. Tambe tin palabracion verbal pero informal cu NGOnan local y acomodacionnan priva pa ubica victimanan di traficacion. Y e plan pa traha un propio centro mester keda ehecuta e aña aki (Huis van Bewaring Dakota).

Beneficio

Victimanan di traficacion di hende tin derecho riba e mesun derecho y proteccion cu ciudadano Arubiano. Pero Gobierno no a raporta cu a duna beneficio. Leynan laboral ta extende un asistencia temporario di migracion pa victimanan stranhero por cambia di dunado di trabou cu ta sospecha di ta abusa di nan. Nan por hasta lanta caso contra traficadornan y si logra conviccion, nan por cobra te cu 50 mil florin como compensacion. Tin un number di telefon cu nan por uza, pero na 2019, ningun hende a haci uzo di e ley aki.

Embahada Hulandes ta sigui asisti sinembargo den proceduranan pa revisa y informa adultonan Colombiano cu ta busca permiso pa traha den e barnan unda tin prostitucion na Aruba. Na momento cu esnan cu ricibi visa yega Aruba, nan ta keda informa riba nan derecho, risico y recurso. Pero, no a haci ningun esfuerso pa reduci e demanda pa relacion sexual comercial.

Mester bisa cu e evaluacion di Aruba tabata pa aña 2019, y ta duna nos pais un aña mas pa mehora e trabou pa no cay den Tier 3. No ta conoci si Departamento di Estado lo tene cuenta cu e condicionnan extraordinario di e pandemia di Covid19 den su analisis di 2021.

Algo hopi yamativo den e TIP reporte 2020 ta e hecho cu a menciona cu Hulanda a para su sosten administrativo pa Grupo di Trabou contra Traficacion y Contrabanda di hende y tambe pa e Coordinado Nacional. Bon Dia Aruba lo acerca e grupo di trabou pa e desaroyo aki.