Despues di cu Crisis Team a informa riba locual ta e maneho nobo na frontera pa evita entrada masivo di e variante di Covid-19 esun denomina Delta, den esaki a tuma nota cu tin cierto confusion.

Pa aclaria esaki Crisis Team ta informa cu e maneho cu a wordo reintroduci na frontera no ta un maneho completamente nobo, pero ta e mesun maneho cu tabatin implementa caba.

E maneho ta encera cu tur persona sea residente of turista cu ta yega Aruba mester provee un test negativo, e persona por provee e test 72 ora prome y upload esaki of e persona por test ora e yega Aruba.

E diferencia ta cu esun cu a upload su test ta yega y drenta Aruba sin restriccion, pero esun cu ta test na Aruba mester bay su cas of hotel y warda den cuarentena te ora haya su resultado di test.

E resultado por dura maximo 24 ora, despues cu e resultado di su test ta conoci, si e ta negativo e residente of turista por continua cu su necesidadnan, si e resultado ta positivo e residente of turista ta keda isola y DVG hunto cu ATA ta percura pa e proceso aki.

Departamento di Salud Publico ta aclaria cu no ta berdad cu un turista of residente na momento cu e drenta Aruba e mester bay den cuarentena 14 dia automaticamente, esaki no ta berdad. E maneho aki tabata wordo implementa caba y a cambia esaki algun siman atras pa facilita entrada di esunnan vacuna na Aruba, pero mirando e situacion alarmante cu e variante Delta ta ocasionando den otro paisnan, Aruba ta tuma e medidanan necesario pa salvaguardia salud di su comunidad y di su economia y ta reintroduci e maneho cu ya tabata vigente caba.

LEAVE A REPLY

Please enter your comment!
Please enter your name here