Ultimo cifranan di economia di Aruba ta mustra un recuperacion remarcable, principalmente bao estimulo di un turismo bastante resiliente. E cifranan di promer cinco luna di 2021 ta mustra un aumento fuerte di entrada di gobierno di impuesto di importacion y di accijns riba combustible y di alcohol y tabaco, indicando cu ta anticipa un recuperacion importante. Di otro banda, entrada di loonbelasting y BBO/BAVP no ta mustrando e mesun tendencia ainda, un indicacion cu fuera di turismo otro sectornan mester di mas tempo pa bin back riba pia.

Den e cifranan di comparacion presenta ta maneha principalmente esunnan di aña 2019, pa por deduci si economia ta bolbiendo na e nivel di e aña ey. Sin embargo, tin cierto tendencia mas a largo plazo cu ta requeri un vista riba e ultimo 10 o 20 aña, por ehemplo, pa por tin idea nos economia ta moviendo en general.

Kico tabata nos desaroyo den ultimo 20 aña?

Pa por tin un bon idea kico tabata nos desaroyo economico den ultimo deacadanan, BDA a reuni e cifranan di crecemento economico di aña 2001 te 2020, tanto pa loke ta GDP nominal y real, segun datonan publica pa Banco Central di Aruba.

Por observa cu pa loke ta GDP nominal, 2019 tabata representa e cifra mas halto den e ultimo 20 aña (Afl. 5925 miyon), pero si cu momentonan anterior cu tabatin un caida momentaneo, manera na 2009/2010, y 2012. E promer ta referi na e crisis financiero/economico global y na 2012 esaki tabata causa pa e ciere definitivo di e refineria. Sin embargo, ora observa e cifranan pa loke ta GDP real, ta obvio cu tabatin mas ‘ups and downs’. Por ehemplo, na 2007 y 2008 e GDP real a surpasa e marca di Afl. 5.000 miyon, pa despues baha bao di 5.000 te na 2015, unda despues e GDP real a sigui riba e nivel menciona y aumentando gradualmente te na 2018. Na 2019 e GDP real a baha en comparacion cu 2018, a base di inflacion mas fuerte, producto di e aumento di impuesto (BBO/BAVP).

GDP real per capita

Ta remarcable cu den e decada di 2000 e cifranan di GDP real – GDP nominal minus efecto di inflacion – tabatin desde 2001 seis aña unda e GDP real per capita (GDP total dividi pa poblacion) tabata riba Afl. 50.000. E ruptura den esaki a bin durante e crisis global cu a inicia na 2008 y tabatin efecto riba 2009 y 2010, unda e GDP real per capita a cay back na nivel di Afl. 45.400 y Afl. 44.000, respectivamente. Den e siguiente decada a dura te na 2018 promer cu a yega atrobe na e marca di Afl. 50.000 den GDP nominal, pero no pa GDP real.

Aña 2020 tabata naturalmente un aña excepcional cu GDP real per capita bahando te na Afl. 37.700. Nos mester bolbe te na decada di añanan 90 pa por topa cu GDP real per capita asina abao.

Poblacion

Ya cu GDP real ‘per capita’ ta depende di tamaño di e poblacion cu cual ta realiza e Producto Interno Bruto (PIB, GDP), ta importante tambe tuma esaki na cuenta. Desde aña 2001, cu Aruba tabatin un poblacion di 91.400 persona, esaki a crece te na 111.100 na 2020, casi 20.000 persona, mas tanto via inmigracion y no crecemento natural (nacemento minus fayecimento). Por cierto cu 2020 tabata e promer aña cu a mira un reduccion (1.100 persona menos) den poblacion, ya cu den e pandemia menos hende e establece na Aruba y relativamente mas hende a emigra. Por observa cu den henter e decada anterior – di 2010 – 2019 – nos no ta yega mas na e nivel di GDP real per capita di e decada anterior, un indicacion cu tabatin cierto crecemento economico, pero cu e aumento di e poblacion, principalmente bao influencia di inmigracion, esaki no ta traduci den un mehoracion considerable di e GDP per capita.

Ta importante tene cuenta cu e tendencianan aki, cu tabata existi promer cu Covid-19, y cu den e futuro recuperacion economico lo hunga un papel atrobe. Principalmente e desaroyo economico, cu ta depende casi completamente di recuperacion di mercado hotelero, mas e aumento di e capacidad cu miles di camber nobo, ta keda stimula entrada di trahador di exterior, cu efecto negativo riba infrastructura en general, manera cuido medico, vivienda y educacion, como tambe riba e modelo di desaroyo economico, basa mayoritariamente riba aumento di capacidad turistico.

LEAVE A REPLY

Please enter your comment!
Please enter your name here