Ayera, durante un conferencia di prensa, Cruz Cora Aruba a anuncia nan evento anual di recaudacion di fondo. E aña aki e fiesta ta bay hiba e tema di “Starry Night” y manera ta custumber, e fondonan recauda ta bay duna Cruz Cora Aruba e oportunidad pa sigui brinda ayudo na comunidad di Aruba cu nan programanan social.

Indra Pereira, Marketing & Fundraising Manager di Cruz Cora Aruba, a splica cu Cruz Cora ta brinda comunidad di Aruba ayudo a traves di varios programa durante henter aña, manera entre otro nan Food Kitchen, Feminine Hygien Program y Biba Bida, entre otro.

Food Kitchen ta un programa cu ta wordo organisa na Lagoweg na e branch di Cruz Cora Aruba na San Nicolas, den cual nan ta sirbi cuminda tres biaha pa siman pa personanan cu mas tin mester di dje. Apart di esaki, Cruz Cora ta yuda e personanan aki tambe cu paña, sapato y productonan pa cuido personal.

E programa Feminine Hygiene Program ta encera entrega di paketenan cu ta consisti di productonan femenino pa yuda e mucha-, hoben- y hendenan muhe cu no tin manera pa cumpra esakinan.

Pereira a indica recientemente cu nan a caba di haci entrega di 1300 pakete di productonan di cuido personal y productonan femenino na scolnan basico y voortgezet onderwijs di SKOA pa yuda muchanan cu no tin y cu tin mester di esaki.

“Esaki ta haci nos hopi contento, pasobra nos sa cu productonan di higiena personal y femenino ya ta cay fuera di e presupuesto di hopi famia cu ta consisti di varios ser femenino. Cu nos por yuda di e manera aki ta duna nos un satisfaccion hopi grandi,” el a expresa.

Cruz Cora Aruba tin un programa yama Biba Bida cu ta nan programa pa adultonan mayor. Cu e programa aki, nan ta organisa cada pasa un luna encuentronan social, educativo y recreacional pa un grupo di mas o menos 80 adulto mayor.

“Asina tambe nos tin varios otro programa of actividad cu nos ta yuda henter aña y asina nos ta touch bida di hopi persona den nos comunidad,” el a agrega.

E evento “Starry Night” ta yuda Cruz Cora Aruba ta tuma luga dia 24 di juni na Passions on the Beach Restaurant y entretenimento ta den man di Robert Jeandor y Su Solo Banda. Ticketnan ta obtenibel na oficina di Cruz Cora Aruba y Amsterdam Manor hotel na balor di 350 florin pa pareha.

“Cu compra di nos ticketnan pa e evento aki dia 24 di juni bo ta yuda nos brinda y sigui continua cu e proyectonan aki. E anochi ta priminti di ta uno magico,” Pereira a remarca.