Dos grupo di militar for di Aruba y Corsou a bay St. Maarten pa yuda den preparacion riba horcan Irma cu awor a bira mas fuerte, categoria 5 y ta spera awe nochi na e isla. Tres boluntario di Cruz Cora Aruba tambe a bay pa duna un man.
E grupo di militarnan for di Aruba ta consisti di miembronan di Arumil y di defensa Hulandes. Total 90 militar di ambos isla a bay St. Maarten. Nan lo yuda cu trabou di preparacion pero tambe den caso ta necesario cu ayudo di emergencia, drecha caminda, asisti autoridadnan pa mantene ordo.
Ayera trafico di aereo entre e islanan ainda tabata posibel. Sinembargo otro vuelonan direccion Merca a experiencia retraso of ya nan a cancela.
Ayera tardi e tres boluntario di Cruz Cora a prepara prome di nan biahe (riba potret). E boluntarionan ta Dionisio Fecito Richardson, Giomar Violenus y Reginald Ricky Tromp.
