19Turismo.JPG

Ta conoci cu Aruba tin hopi debe y ya pa algun aña caba, e sector di turismo ta cargando esaki y tin cu bisa cu e hilo ta birando rato pa rato mas fini. Sin embargo e bon noticia ta cu pasonan a wordo tuma pa asina habri nos refineria y ta un cuestion di sinta warda pa asina gobierno por firma e acuerdo final, indicando cu nos refineria tin un doño nobo, cual ta Citgo.

Ex presidente di FTA, sindicalista Rudy Geerman ta spera cu e dianan por cuminsa cana lihe pa caba, pasobra turismo no por carga e peso di e debenan di gobierno su so.

Suerte sinembargo ta na banda di pais Aruba y esey el a bin ta bisa pa basta tempo caba. Nos refineria a wordo traha basa riba e crudo pisa di Venezuela y tin un demanda enorme di petroleo. 

Cu apertura di e refineria, lo trece mas hende na trabao y tambe e pago lo ta mas halto, cu un resultado positivo pa e trahado y pa su famia. Economia lo “boom” pa loke ta e negoshi na San Nicolas, cu lo haya un bida y di un otro banda, e contratistanan lo florece bek. Cu un refineria asina, e efecto economico lo ta rapido cu asina por spera un spin effect. Awo ta djis sinta warda, manera indica anteriormente, riba e dia, cu e apertura wordo anuncia oficialmente.

No mester mira si e refineria lo mester ta mesun grandi of no compara cu e operador anterior, pero si mester mira kico prome lo ta nan intencion. Ta e manera con e ta bay wordo opera mester tira bista riba dje. Si tin cu bisa, pa con chikito of grandi e lo ta, e efecto cu e lo bay tin riba nos economia, lo ta uno magistral.

Negociacionnan adicional

Pa loke ta e otro sectornan den nos pais, manera e sector hotelero, negociacionnan ta bayendo bon, segun Rudy Geerman. Tin sectornan cu cos ta bayendo bon, pero tin sector ta pasando den un temporada dificil. Tin algun sector cu aña habri por ripara cu kisas no lo por firma un CAO, sin extension sin un aumento, kisas cu un lumpsum. 

CAOnan den tapara

Pa e aña aki caba, tin casi 18 pa 20 CAO cu tin cu wordo negosha. Y esaki ta nifica cu bon cos so ta na caminda, cu mayoria di e trahadonan lo bay disfruta di un aumento directamente riba nan salario y cu mehoracion di algun beneficio secundario, e sindicalista a finalisa.

 

LEAVE A REPLY

Please enter your comment!
Please enter your name here